రాయలసీమ న్యూస్, వై.యస్.ఆర్: మైదుకూరు: వైఎస్సార్ కాంగ్రెస్ పార్టీ నాయకులపై అక్రమ కేసులు నమోదు చేస్తున్నారని ఆరోపిస్తూ వైఎస్సార్సీపీ జిల్లా అధ్యక్షుడు రవీంద్రనాథ్ రెడ్డి, మైదుకూరు మాజీ ఎమ్మెల్యే రఘురామిరెడ్డి తీవ్ర ఆగ్రహం వ్యక్తం చేశారు. మైదుకూరులో వైఎస్సార్సీపీ జిల్లా బీసీ సెల్ అధ్యక్షుడు నేట్లపల్లి శివరాంపై పోలీసులు నాన్ బెయిలబుల్ కేసు నమోదు చేసిన విధానాన్ని వారు ఖండించారు.
సోషల్ మీడియా వేదికలో పంచిన ఒక పాత వీడియోను సాకుగా చూపిస్తూ శివరాంపై కేసు పెట్టడం అన్యాయమని నేతలు అభిప్రాయపడ్డారు. మధ్యాహ్న భోజనంలో బల్లి పడినట్లు ఉన్న ఆ వీడియోను షేర్ చేశారనే నెపంతో కక్షపూరితంగా కేవలం శివరాంను మాత్రమే లక్ష్యంగా చేసుకుని కేసు నమోదు చేయడం పోలీసుల అణచివేత ధోరణికి నిదర్శనమని వారు విమర్శించారు.
రాబోయే స్థానిక సంస్థల ఎన్నికలను దృష్టిలో పెట్టుకుని అధికార తెలుగు దేశం పార్టీ నేతలు ఇలాంటి కుట్రలకు పాల్పడుతున్నారని వైఎస్సార్సీపీ నాయకులు ఆరోపించారు. ఉద్దేశపూర్వకంగా అక్రమ కేసులు పెట్టి వైఎస్సార్సీపీ శ్రేణులను బైండోవర్ చేసి భయాందోళనలకు గురిచేయాలని ప్రయత్నిస్తున్నారని వారు మండిపడ్డారు.
నేట్లపల్లి శివరాంపై నమోదైన నాన్ బెయిలబుల్ కేసును తక్షణమే ఎత్తివేయాలని డిమాండ్ చేస్తూ వైఎస్సార్సీపీ నేతలు జిల్లా సూపరింటెండెంట్ అఫ్ పోలీస్ కి ఫిర్యాదు చేశారు. ఈ సందర్భంగా వారు శివరాం నిర్దోషి అని, రాజకీయ కక్షల నేపథ్యంలోనే ఆయనను టార్గెట్ చేశారని పోలీసు అధికారులకు వివరించినట్లు పార్టీ వర్గాలు తెలిపాయి.
ఎస్పీని కలిసిన వారిలో వైఎస్సార్సీపీ జిల్లా అధ్యక్షుడు రవీంద్రనాథ్ రెడ్డి, మైదుకూరు మాజీ ఎమ్మెల్యే రఘురామిరెడ్డితో పాటు పలువురు వైఎస్సార్సీపీ ముఖ్య నాయకులు, కార్యకర్తలు ఉన్నారు. మైదుకూరులో పార్టీ శ్రేణులపై జరుగుతున్న కేసుల నమోదు, పోలీసుల వ్యవహార శైలిపై వారు ఎస్పీ దృష్టికి తీసుకెళ్లినట్లు సమాచారం.
వైఎస్సార్సీపీ నేతలపై కేసులు, నేట్లపల్లి శివరాం అరెస్టు ప్రయత్నాల నేపథ్యంలో మైదుకూరులో రాజకీయ వేడి చెలరేగింది. పార్టీ కార్యకర్తలు పోలీసుల చర్యలపై ఆగ్రహం వ్యక్తం చేస్తూ, శివరాంపై కేసును ఉపసంహరించుకోవాలని డిమాండ్ చేస్తున్నారు. మరోవైపు, ఈ వ్యవహారంపై అధికారుల స్పందన కోసం ఎదురుచూడాల్సి ఉంది.
