రాయలసీమ న్యూస్, వై.యస్.ఆర్: 2026 మున్సిపల్ ఎన్నికల నిర్వహణకు సంబంధించి ప్రొద్దుటూరు పురపాలక సంఘం పరిధిలో ఎన్నికల విధులు నిర్వహించనున్న సిబ్బందికి అవసరమైన శిక్షణ, మార్గదర్శకాలు అందించేందుకు నియమించబడిన మాస్టర్ ట్రైనర్లతో మున్సిపల్ కార్యాలయంలో బుధవారం సమీక్ష సమావేశం జరిగింది.
ఈ సమావేశంలో మున్సిపల్ కమిషనర్ తూతిక శ్రీనివాస విశ్వనాథ్ ఎన్నికల ప్రక్రియకు సంబంధించిన వివిధ అంశాలపై మాస్టర్ ట్రైనర్లతో సమీక్ష నిర్వహించారు. ఎన్నికల విధుల్లో పాల్గొనే సిబ్బందికి ఎన్నికల నిబంధనలు, విధి నిర్వహణలో పాటించాల్సిన జాగ్రత్తలు, పోలింగ్ ప్రక్రియ, బాధ్యతలు, ఎన్నికల సామగ్రి వినియోగం తదితర అంశాలపై స్పష్టమైన, ప్రామాణిక శిక్షణ అందించాలని కమిషనర్ సూచించారు.
ఎన్నికల విధుల్లో ఎలాంటి పొరపాట్లకు తావులేకుండా ప్రతి అంశాన్ని మాస్టర్ ట్రైనర్లు పూర్తిగా అవగాహన చేసుకోవాలని, తమ ఆధ్వర్యంలో శిక్షణ పొందే సిబ్బందికి సులభంగా అర్థమయ్యే విధంగా బోధించాలని తూతిక శ్రీనివాస విశ్వనాథ్ ఆదేశించారు. ఎన్నికల సంఘం మార్గదర్శకాలను తప్పనిసరిగా పాటిస్తూ, విధుల నిర్వహణలో పరస్పర సమన్వయంతో పనిచేయాలని ఆయన సూచించారు.
ఈ శిక్షణ కార్యక్రమంలో సుమారు 500 మందికి శిక్షణ ఇవ్వాలని నిర్ణయించారు. ఇందులో ఎన్నికల సిబ్బంది, పోలింగ్ సిబ్బంది, కౌంటింగ్ సిబ్బంది ఉంటారు. మొత్తం 14 మంది మాస్టర్ ట్రైనర్లు ఈ శిక్షణను మూడు దశలుగా నిర్వహించనున్నారు. అనిబిసెంట్ మున్సిపల్ హై స్కూల్లో శిక్షణ తరగతులు ఏర్పాటు చేయనున్నట్లు సమావేశంలో వెల్లడైంది.
ఎన్నికల ప్రక్రియకు సంబంధించిన సందేహాలు, సాంకేతిక అంశాలు, విధి నిర్వహణలో ఎదురయ్యే సమస్యలను ముందుగానే గుర్తించి, వాటిపై సిబ్బందికి తగిన అవగాహన కల్పించాలని కమిషనర్ సంబంధిత అధికారులను ఆదేశించారు. ప్రతి దశలో శిక్షణ నాణ్యతను పర్యవేక్షించి, అవసరమైన చోట మార్గనిర్దేశం చేయాలని సూచించారు.
ఈ సమావేశంలో అసిస్టెంట్ కమిషనర్ మంజునాథ్ గౌడ్, అసిస్టెంట్ సిటీ ప్లానర్ సి.టి. కృష్ణ సింగ్, టౌన్ ప్లానింగ్ ఆఫీసర్ జి. చంద్ర మోహన్ పాల్గొన్నారు. మాస్టర్ ట్రైనర్లుగా టి. కుళాయి రెడ్డి, వి. రవీంద్ర రెడ్డి, ఈ. అమర్నాథ్ రెడ్డి, ఎస్. మనోహర్ రెడ్డి, డి. భాస్కర్ రావు, డి. సలీం, కె. వెంకటేశు, టి. ప్రశాంత్ రాజు, డి. మల్లికార్జున రెడ్డి, వై. సుబ్రమణ్యం, కె. రామ లక్ష్మయ్య, యు. రమేష్ బాబు తదితరులు హాజరయ్యారు.
ఎన్నికల నిర్వహణలో ప్రతి అధికారి, సిబ్బంది తమకు అప్పగించిన బాధ్యతలను పూర్తి బాధ్యతతో, నిష్పక్షపాతంగా, ఎన్నికల నిబంధనలకు అనుగుణంగా నిర్వహించాలని కమిషనర్ తూతిక శ్రీనివాస విశ్వనాథ్ స్పష్టం చేసినట్లు అధికార వర్గాలు తెలిపాయి.
