రాయలసీమ న్యూస్, వై.యస్.ఆర్: ప్రొద్దుటూరు: పట్టణంలోని అగస్త్యేశ్వర స్వామి ఆలయంలో బుధవారం మాస శివరాత్రి సందర్భంగా ప్రత్యేక పూజా కార్యక్రమాలు భక్తిశ్రద్ధలతో నిర్వహించారు. తెల్లవారుజాము నుంచే ఆలయ ప్రాంగణం భక్తులతో కిటకిటలాడింది. ఆలయ నిర్వాహకుల ఆధ్వర్యంలో స్వామివారికి, అమ్మవారికి నిత్యకర్మలతో పాటు విశేష పూజలు నిర్వహించారు.
మాస శివరాత్రి సందర్భంగా అగస్త్యేశ్వర స్వామికి రుద్రాభిషేకం నిర్వహించారు. వివిధ ద్రవ్యాలతో అభిషేకాలు చేసి, పుష్పాలతో శోభాయమానంగా అలంకరించారు. అమ్మవారికి కుంకుమార్చన చేసి, ప్రత్యేక శృంగార దర్శనం కల్పించారు. భక్తులు కుటుంబ సమేతంగా హాజరై పూజల్లో పాల్గొని, స్వామి, అమ్మవారిని దర్శించుకున్నారు.
ఈ సందర్భంగా ఆలయంలో గణపతి, నవగ్రహ, రుద్ర హోమాలు నిర్వహించారు. వేద పండితులు మంత్రోచ్చారణల మధ్య హోమకుండాల్లో ఆహుతులు సమర్పించారు. కార్యక్రమం ముగింపులో పూర్ణాహుతి సమర్పించి, భక్తులకు తీర్థప్రసాదాలు పంపిణీ చేశారు. హోమాల సమయంలో ఆలయ పరిసరాలు వేదఘోషలతో మార్మోగాయి.
సాయంత్రం గంగా, రాజారాజేశ్వరి సమేత అగస్త్యేశ్వర స్వామి ఉత్సవ మూర్తులకు వేద పండితుల సాన్నిధ్యంలో కళ్యాణోత్సవం నిర్వహించారు. మంగళ వాయిద్యాల నాదంతో, వేద మంత్రాల మధ్య స్వామివారి కళ్యాణం ఘనంగా జరిగింది. కళ్యాణ మండపాన్ని పూలతో, విద్యుత్ దీపాలతో అలంకరించగా, భక్తులు పెద్ద సంఖ్యలో హాజరై కళ్యాణోత్సవాన్ని వీక్షించారు.
కళ్యాణోత్సవం అనంతరం స్వామివారి ఉత్సవ మూర్తులను ఆలయ ప్రదక్షిణ మార్గంలో ఊరేగించారు. భక్తులు హారతులు పట్టి స్వామివారిని దర్శించుకున్నారు. మాస శివరాత్రి సందర్భంగా నిర్వహించిన ఈ కార్యక్రమాల వల్ల ఆలయ పరిసరాలు ఉత్సవ వాతావరణంతో కళకళలాడాయి.
