రాయలసీమ న్యూస్, వై.యస్.ఆర్: ప్రొద్దుటూరు: స్థానిక శ్రీ అగస్త్యేశ్వర స్వామి దేవస్థానంలో భక్తులు, వేదపాఠశాల విద్యార్థుల తాగునీటి అవసరాలను తీర్చేందుకు ఒక దాతృత్వ కుటుంబం ముందుకు వచ్చింది. ఆలయంలో తాగునీటి కోసం ప్రతి నెల వేలాది రూపాయలు వెచ్చించి నీటిని కొనుగోలు చేస్తున్న పరిస్థితిని గమనించిన ఆ కుటుంబం, స్వామివారి సేవార్థం వాటర్ ప్లాంట్ ఏర్పాటు చేయాలని నిర్ణయించింది.
డి.కె. సుబ్రహ్మణ్యం, డి.కె. శివప్రసాద్, డి.కె. సతీష్ బాబు మరియు వారి కుటుంబ సభ్యులు కలిసి దాదాపు రూ.3.50 లక్షల అంచనా వ్యయంతో ఆలయ ప్రాంగణంలో వాటర్ ప్లాంట్ను సమర్పించారు. ఈ ప్లాంట్ ద్వారా ఆలయానికి వచ్చే భక్తులు, వేదపాఠశాల విద్యార్థులకు నిరంతరం స్వచ్ఛమైన తాగునీరు అందేలా ఏర్పాట్లు చేయనున్నారు.
ఈ సందర్భంగా ఆదివారం ఉదయం 8 గంటలకు ఆలయ చైర్మన్, పాలకమండలి సభ్యులు, ఆలయ కార్యనిర్వహణాధికారి కలిసి దాత కుటుంబ సభ్యులను ఆలయ మర్యాదలతో ఘనంగా ఆహ్వానించారు. అనంతరం వారి చేతుల మీదుగా వాటర్ ప్లాంట్ నిర్మాణానికి భూమిపూజ కార్యక్రమాన్ని నిర్వహించారు.
భూమిపూజ అనంతరం ఆలయ అర్చకులు ప్రత్యేక పూజా కార్యక్రమాలు నిర్వహించారు. దాత కుటుంబ సభ్యులకు వేద ఆశీర్వచనం అందజేసి, స్వామివారి కృప కలగాలని ప్రార్థించారు. కార్యక్రమం మొత్తం భక్తి శ్రద్ధలతో, ఆలయ సంప్రదాయాలకు అనుగుణంగా సాగింది.
భక్తులకు, వేదపాఠశాల విద్యార్థులకు నిరంతరం స్వచ్ఛమైన తాగునీరు అందించేందుకు ఈ వాటర్ ప్లాంట్ ఎంతో ఉపయోగపడుతుందని ఆలయ నిర్వాహకులు తెలిపారు. ఇప్పటి వరకు తాగునీటి కొనుగోలుకు వెచ్చిస్తున్న వ్యయం తగ్గి, ఆ మొత్తాన్ని ఇతర సేవా కార్యక్రమాలకు వినియోగించే అవకాశం ఉంటుందని వారు పేర్కొన్నారు.
ఈ కార్యక్రమం ఆలయ చైర్మన్ వంగల నారాయణరెడ్డి, ఆలయ కార్యనిర్వహణాధికారి కె.వి. రమణ ఆధ్వర్యంలో జరిగింది. దాత కుటుంబం చేసిన ఈ సేవను ఆలయ అధికారులు, పాలకమండలి సభ్యులు అభినందించారు. స్వామివారి సేవలో ముందుకు వచ్చిన ఈ కుటుంబం ఆదర్శంగా నిలుస్తుందని ఆలయ వర్గాలు అభిప్రాయపడ్డాయి.
