రాయలసీమ న్యూస్, వై.యస్.ఆర్: ప్రొద్దుటూరు పట్టణంలోని అఖిల భారత ప్రజాతంత్ర మహిళా సంఘం (ఐద్వా) కార్యాలయంలో శుక్రవారం విలేకరుల సమావేశం జరిగింది. ఈ సమావేశంలో ఐద్వా కార్యదర్శి జి. ప్రేమ, అధ్యక్షురాలు వై. విజయమ్మలు పాల్గొని పెన్షన్ల సమస్యపై ఆందోళన వ్యక్తం చేశారు.
కూటమి ప్రభుత్వం ఏర్పడి సుమారు 30 నెలలు గడుస్తున్నప్పటికీ, ఇప్పటికీ అనేక మంది ఒంటరి మహిళలు, వృద్ధులు, వితంతువులకు పెన్షన్లు అందడం లేదని నేతలు పేర్కొన్నారు. గత రెండున్నరేళ్లుగా ఈ వర్గాల పెన్షన్లు నిలిపివేయడం వల్ల వారు తీవ్ర ఆర్థిక ఇబ్బందులు ఎదుర్కొంటున్నారని తెలిపారు.
భర్తలను కోల్పోయిన అనేక మంది వితంతువులు కుటుంబాలను పోషించుకోలేక నానా అవస్థలు పడుతున్నారని ఐద్వా నాయకులు వివరించారు. వృద్ధులు, ఒంటరి మహిళలు పూర్తిగా ఈ పెన్షన్లపైనే ఆధారపడి జీవనం సాగిస్తున్న నేపథ్యంలో, పెన్షన్లు నిలిచిపోవడం వారి జీవనోపాధిపై తీవ్ర ప్రభావం చూపుతోందని అన్నారు.
ప్రభుత్వం వెంటనే స్పందించి నిలిచిపోయిన పెన్షన్లను పునరుద్ధరించాలని, అర్హులైన ప్రతి ఒక్కరికీ ఆర్థిక భరోసా కల్పించాల్సిన అవసరం ఉందని ఐద్వా నాయకులు డిమాండ్ చేశారు. పెన్షన్ విధానంలో ఉన్న లోపాలను సరిదిద్దుతూ, అర్హుల జాబితాను పునర్విమర్శించి, ఎవరూ అన్యాయానికి గురికాకుండా చూడాలని కోరారు.
ఈ సమస్యను ప్రభుత్వం త్వరగా పరిష్కరించకపోతే, రాబోయే రోజుల్లో ఒంటరి మహిళలు, వృద్ధులు, వితంతువులను సమీకరించి పెద్ద ఎత్తున ఆందోళనలు చేపట్టే పరిస్థితి వస్తుందని హెచ్చరించారు. ప్రజల జీవనోపాధికి సంబంధించిన అంశాన్ని ప్రభుత్వం తేలికగా తీసుకోకూడదని, సామాజిక న్యాయం దృష్ట్యా పెన్షన్ల పునరుద్ధరణకు ప్రాధాన్యత ఇవ్వాలని ఐద్వా నాయకులు స్పష్టం చేశారు.
