రాయలసీమ న్యూస్, వై.యస్.ఆర్: పొద్దుటూరు: అప్కోస్ ఔట్ సోర్సింగ్ ఎంప్లాయ్ ఫెడరేషన్ ఆధ్వర్యంలో ఔట్ సోర్సింగ్ ఉద్యోగుల సమస్యల పరిష్కారానికి సంబంధించి కరపత్రం విడుదల చేశారు. సోమవారం పొద్దుటూరు సమీపంలోని గోపవరం వద్ద ఉన్న వెటర్నరీ కాలేజీలో జరిగిన సమావేశంలో ఈ కార్యక్రమం నిర్వహించారు.
అప్కోస్లో పనిచేస్తున్న ఔట్ సోర్సింగ్ కార్మికులను రెగ్యులర్ చేయాలని, ఈలోగా సమాన పనికి సమాన వేతనం అమలు చేయాలని ఫెడరేషన్ నాయకులు డిమాండ్ చేశారు. ఔట్ సోర్సింగ్ ఉద్యోగుల హక్కుల సాధన కోసం ప్రభుత్వం తక్షణ చర్యలు తీసుకోవాలని కోరారు.
కరపత్రం ద్వారా కార్మికుల సమస్యలను వివరించి, వారి సేవలకు తగిన గుర్తింపు, భద్రత కల్పించాలని, వేతనాలు, ఇతర సౌకర్యాలు మెరుగుపరచాలని ఫెడరేషన్ ప్రతినిధులు పేర్కొన్నారు. ఔట్ సోర్సింగ్ విధానంతో కార్మికులు అనేక ఇబ్బందులు ఎదుర్కొంటున్నారని, వీటిని పరిష్కరించేందుకు సమిష్టి పోరాటం అవసరమని నాయకులు అభిప్రాయపడ్డారు.
ఔట్ సోర్సింగ్ ఉద్యోగుల హక్కుల సాధనకై సెప్టెంబర్ 27న తిరుపతిలోని యశోద నగర్లో ఉన్న వేమన విజ్ఞానకేంద్రంలో సిఐటియు ఆధ్వర్యంలో ప్రాంతీయ సదస్సు జరగనుంది. ఈ సదస్సుకు అప్కోస్ ఔట్ సోర్సింగ్ ఉద్యోగులు అందరూ తరలిరావాలని ఫెడరేషన్ నాయకులు పిలుపునిచ్చారు.
ఈ కార్యక్రమంలో సిఐటియు జిల్లా కార్యదర్శి సత్యనారాయణ పాల్గొన్నారు. అప్కోస్ ఔట్ సోర్సింగ్ ఎంప్లాయ్ ఫెడరేషన్ జిల్లా నాయకులు పి. రాఘవ సుబ్బారావు, నాయకులు ఓబులేసు, రమణతో పాటు ఔట్ సోర్సింగ్ ఉద్యోగులు హాజరయ్యారు. సమావేశంలో కార్మికుల సమస్యలపై చర్చించి, ప్రాంతీయ సదస్సును విజయవంతం చేయాలని నిర్ణయించారు.
