రాయలసీమ న్యూస్, వై.యస్.ఆర్: ప్రొద్దుటూరు మాజీ ఎమ్మెల్యే రాచమల్లు శివ ప్రసాద్ రెడ్డి చేసిన వ్యాఖ్యలపై సీమాంధ్ర బీసీ సంక్షేమ సంఘం మండల నాయకత్వం తీవ్ర అభ్యంతరం వ్యక్తం చేసింది. మండల కేంద్రమైన సీమాంధ్ర బీసీ సంక్షేమ సంఘం కార్యాలయంలో జరిగిన సమావేశంలో సంఘం మండల అధ్యక్షుడు దూదేకుల మహబూబ్ బాషా ఈ విషయంపై స్పందించారు.
ప్రొద్దుటూరులో ప్రజాదరణ పొందిన బీసీ నాయకుడు, సీమాంధ్ర బీసీ సంక్షేమ సంఘం రాష్ట్ర ఉపాధ్యక్షుడు చల్లా రాజగోపాల్ యాదవ్ను ఉద్దేశించి రాచమల్లు శివ ప్రసాద్ రెడ్డి అనుచితంగా మాట్లాడిన విధానం బీసీల మనోభావాలను దెబ్బతీసిందని మహబూబ్ బాషా పేర్కొన్నారు. బీసీ నాయకుడిని దూషించడం తగదని ఆయన స్పష్టం చేశారు.
చల్లా రాజగోపాల్ యాదవ్ కుల, మత భేదాలు లేకుండా ఎన్నో సేవా కార్యక్రమాలు చేపడుతున్నారని సంఘం నాయకత్వం గుర్తుచేసింది. పెద్ద ఎత్తున అన్నదాన కార్యక్రమాలు నిర్వహించడం, నిరుపేద విద్యార్థులకు సొంత నిధులతో చదువు సౌకర్యం కల్పించడం, వారికి భోజనం, వసతి ఏర్పాట్లు చేయించడం, నిరుపేదల పెళ్లిళ్లు జరిపించడం వంటి సేవా కార్యక్రమాల ద్వారా ఆయన బీసీలకే కాకుండా అన్ని వర్గాల నిరుపేదలకు అండగా నిలుస్తున్నారని మండల అధ్యక్షుడు వివరించారు.
బీసీలను కలుపుకుని పోయే నాయకుడైన చల్లా రాజగోపాల్ యాదవ్పై చేసిన అనుచిత వ్యాఖ్యలను వెంటనే వెనక్కి తీసుకుని, ఆయనకు క్షమాపణ చెప్పాలని సీమాంధ్ర బీసీ సంక్షేమ సంఘం తరఫున మహబూబ్ బాషా డిమాండ్ చేశారు. ఈ ఘటనపై బీసీ వర్గాల్లో ఆగ్రహం నెలకొన్నట్లు ఆయన తెలిపారు.
ప్రజానాయకుడైన చల్లా రాజగోపాల్ యాదవ్ గురించి మరలా అనుచితంగా మాట్లాడితే, బీసీ సంఘాల ఆధ్వర్యంలో రాష్ట్రవ్యాప్తంగా ఆందోళనలు చేపట్టే పరిస్థితి వస్తుందని మహబూబ్ బాషా హెచ్చరించారు. బీసీ నాయకుల గౌరవాన్ని కాపాడేందుకు సంఘం కట్టుబడి ఉందని ఆయన స్పష్టం చేశారు.
