రాయలసీమ న్యూస్, వై.యస్.ఆర్:
సీఎం, డిప్యూటీ సీఎం పర్యటన: ప్రొద్దుటూరులో భద్రతా ఏర్పాట్లపై జిల్లా ఎస్పీ దిశానిర్దేశం
వై.ఎస్.ఆర్. కడప జిల్లాలో ముఖ్యమంత్రి నారా చంద్రబాబు నాయుడు, ఉప ముఖ్యమంత్రి పవన్ కళ్యాణ్ పర్యటనను పురస్కరించుకుని భద్రతా ఏర్పాట్లను సమీక్షించారు. ఈ నెల 5న జరగనున్న పర్యటన సందర్భంగా ప్రొద్దుటూరు పట్టణంలో పోలీసు విభాగం చేపట్టాల్సిన బందోబస్తు చర్యలపై జిల్లా ఎస్పీ షెల్కే నచికేత్ విశ్వనాథ్, ఐపీఎస్, పోలీసు అధికారులకు, సిబ్బందికి సూచనలు జారీ చేశారు.
ప్రొద్దుటూరులోని శ్రీదేవి ఫంక్షన్ హాల్లో సోమవారం నిర్వహించిన సమీక్షా సమావేశంలో ఎస్పీ నచికేత్ విశ్వనాథ్ పర్యటనకు సంబంధించిన సమగ్ర భద్రతా ప్రణాళికను వివరించారు. ముఖ్యమంత్రి, ఉప ముఖ్యమంత్రి పర్యటన మార్గం, బహిరంగ సభా ప్రాంగణం, హెలిప్యాడ్, పార్కింగ్ ప్రాంతాలు, వీఐపీ ప్రవేశ ద్వారాల్లో ముందస్తు భద్రతా తనిఖీలు తప్పనిసరిగా నిర్వహించాలని ఆయన ఆదేశించారు.
ప్రతి అధికారి, సిబ్బంది తమకు కేటాయించిన బాధ్యతలను అప్రమత్తంగా, పూర్తి సమన్వయంతో నిర్వర్తించాలని ఎస్పీ సూచించారు. ఏ చిన్న నిర్లక్ష్యానికీ తావు ఇవ్వకుండా, విధుల్లో క్రమశిక్షణ, సమయపాలన పాటించాలని ఆయన స్పష్టం చేశారు.
ట్రాఫిక్ నియంత్రణ, డైవర్షన్లు, పార్కింగ్ ఏర్పాట్లపై ప్రత్యేక దృష్టి సారించాలని ఎస్పీ ఆదేశించారు. పర్యటన సమయంలో ప్రజలకు ఎలాంటి అసౌకర్యం కలగకుండా చూడాలని, అత్యవసర సేవల వాహనాల రాకపోకలకు ఎలాంటి ఆటంకం కలగకుండా సమర్థవంతమైన ట్రాఫిక్ నిర్వహణ చేపట్టాలని సూచించారు.
ముఖ్యమంత్రి, ఉప ముఖ్యమంత్రి పర్యటన విజయవంతం కావడానికి సంబంధిత అన్ని విభాగాల మధ్య సమన్వయం అత్యంత కీలకమని ఎస్పీ నచికేత్ విశ్వనాథ్ పేర్కొన్నారు. భద్రతా ఏర్పాట్లలో ఎలాంటి లోపాలు ఉండకూడదని, ప్రతి దశను ముందుగానే పరిశీలించి చర్యలు తీసుకోవాలని ఆయన అధికారులను ఆదేశించారు.
ఈ కార్యక్రమంలో అనంతపురం జిల్లా ఎస్పీ పి. జగదీష్, ఐపీఎస్, నంద్యాల జిల్లా ఎస్పీ సునీల్ షోరాణ్, ఐపీఎస్, అన్నమయ్య జిల్లా ఎస్పీ ధీరజ్ కునుబిల్లి, ఐపీఎస్, అదనపు ఎస్పీ (అడ్మిన్) కె. ప్రకాష్ బాబు, ప్రొద్దుటూరు ఎ.ఎస్పీ విబుకృష్ణ, ఐపీఎస్, స్పెషల్ బ్రాంచ్ డీఎస్పీ ఎన్. సుధాకర్, జిల్లాలోని డీఎస్పీలు, సీఐలు, ఎస్‌ఐలు, పోలీసు సిబ్బంది పాల్గొన్నారు.
