రాయలసీమ న్యూస్, వై.యస్.ఆర్: ప్రొద్దుటూరు మున్సిపాలిటీలో పనిచేస్తున్న పారిశుధ్య కార్మికుల కుటుంబాలకు చెందిన ఉన్నత విద్యార్థుల కోసం మున్సిపల్ కమిషనర్ తూతిక శ్రీనివాస విశ్వనాధ్ ఆధ్వర్యంలో ప్రత్యేక కార్యక్రమం నిర్వహించనున్నారు. ‘కాఫీ విత్ కమిషనర్’ పేరుతో ఏర్పాటు చేసిన ఈ ముఖాముఖి కార్యక్రమం అక్టోబర్ 2న గాంధీ జయంతి సందర్భంగా జరగనుంది.
ఈ కార్యక్రమం ఉదయం 11 గంటల నుంచి మధ్యాహ్నం 1 గంట వరకు మున్సిపల్ కమిషనర్ ఛాంబర్‌లో జరుగుతుంది. ప్రొద్దుటూరు మున్సిపాలిటీలో పారిశుధ్య పనులు చేస్తున్న కార్మికుల కుటుంబాలకు చెందిన డిగ్రీ, ఆపై ఉన్నత విద్యను అభ్యసిస్తున్న విద్యార్థులను ఈ సమావేశానికి ఆహ్వానిస్తున్నారు.
విద్యార్థుల ఆశయాలు, ప్రతిభ, కెరీర్ లక్ష్యాలను తెలుసుకోవడంతో పాటు, వారి భవిష్యత్తు అభివృద్ధికి అవసరమైన మార్గదర్శకత్వం, ప్రోత్సాహాన్ని అందించడమే ఈ కార్యక్రమం ముఖ్య ఉద్దేశ్యంగా మున్సిపల్ అధికారులు పేర్కొన్నారు. పట్టణ పరిశుభ్రత కోసం శ్రమించే పారిశుధ్య కార్మికుల కుటుంబాల పిల్లలకు విద్యా, ఉద్యోగ అవకాశాలపై స్పష్టత కల్పించేందుకు ఈ కార్యక్రమం ఉపయోగపడనుందని భావిస్తున్నారు.
పట్టణ పరిశుభ్రతలో పారిశుధ్య కార్మికుల పాత్ర కీలకమని, వారి కుటుంబాల విద్యా పురోగతికి మున్సిపాలిటీ స్థాయిలో చేయూత అందించాల్సిన అవసరం ఉందని అధికార వర్గాలు అభిప్రాయపడుతున్నాయి. ఈ నేపథ్యంలో గాంధీ జయంతి రోజున నిర్వహిస్తున్న ‘కాఫీ విత్ కమిషనర్’ కార్యక్రమం ద్వారా విద్యార్థులు తమ సందేహాలు, లక్ష్యాలు, అభిరుచులను కమిషనర్‌తో నేరుగా పంచుకునే అవకాశం లభించనుంది.
పట్టణ పరిశుభ్రత కోసం శ్రమించే చేతులకు గౌరవం. ఆ చేతుల పిల్లల కలలకు కమిషనర్ గారి తోడ్పాటు.
కాఫీ విత్ కమిషనర్ అంటే కేవలం ఒక సందేశం కాదు.. పారిశుధ్య కార్మికుల పిల్లల ప్రతిభను ప్రోత్సాహించడం.
పారిశుధ్య కార్మికుల కుటుంబాల విద్యార్థులు ఈ అవకాశాన్ని వినియోగించుకుని, తమ భవిష్యత్ ప్రణాళికలను కమిషనర్‌తో చర్చించి, అవసరమైన మార్గదర్శకత్వం పొందాలని మున్సిపల్ అధికారులు సూచిస్తున్నారు. గాంధీ జయంతి సందర్భంగా జరుగుతున్న ఈ కార్యక్రమం ద్వారా సమాజంలో సేవలు అందిస్తున్న పారిశుధ్య కార్మికుల కుటుంబాలపై ప్రత్యేక దృష్టి సారించబడుతోంది.
