రాయలసీమ న్యూస్, వై.యస్.ఆర్: ప్రొద్దుటూరు పట్టణంలో కార్పొరేట్ సెలూన్ల వ్యాపారస్తులు స్థానిక నాయిబ్రాహ్మణుల జీవనోపాధిపై చూపుతున్న ప్రభావంపై ఆందోళన వ్యక్తమైంది. ఈ నేపథ్యంలో ప్రొద్దుటూరులో నాయిబ్రాహ్మణులతో ఆత్మీయ సమావేశం జరిగింది. మాజీ ఎమ్మెల్యే రాచమల్లు శివప్రసాద్ రెడ్డి ఆధ్వర్యంలో జరిగిన ఈ సమావేశానికి నాయిబ్రాహ్మణ సంఘం నాయకులు, స్థానిక వ్యాపారులు హాజరయ్యారు.
నాయిబ్రాహ్మణ సంఘం రాష్ట్ర అధ్యక్షుడు యానాదయ్య మాట్లాడుతూ, బయట ప్రాంతాల నుంచి వస్తున్న కార్పొరేట్ సెలూన్ల కారణంగా స్థానిక నాయిబ్రాహ్మణుల జీవనోపాధి తీవ్రంగా దెబ్బతింటోందని పేర్కొన్నారు. తరతరాలుగా ఈ వృత్తినే ఆధారంగా చేసుకుని పేదరికంలో జీవిస్తున్న నాయిబ్రాహ్మణులను ప్రైవేట్ వ్యాపారస్తుల దోపిడీ మరింత కష్టాల్లోకి నెడుతోందని ఆయన అభిప్రాయపడ్డారు.
మాజీ ఎమ్మెల్యే రాచమల్లు శివప్రసాద్ రెడ్డి మాట్లాడుతూ, ఇది వ్యక్తిగత పోరాటం కాదని, ప్రొద్దుటూరు శ్రామికుల, ముఖ్యంగా నాయిబ్రాహ్మణుల హక్కుల కోసం జరుగుతున్న సామూహిక పోరాటమని స్పష్టం చేశారు. కార్పొరేట్ సెలూన్ల పేరుతో బయటి నుంచి వచ్చి, స్థానిక పేద నాయిబ్రాహ్మణుల జీవనోపాధిని హరించడం అన్యాయమని ఆయన అభిప్రాయపడ్డారు.
సమావేశంలో పాల్గొన్న నాయిబ్రాహ్మణులు, స్థానిక వ్యాపారులు కార్పొరేట్ సెలూన్ల వల్ల తమ ఆదాయం తగ్గిపోతుందని, ప్రభుత్వ, స్థానిక ప్రజాప్రతినిధులు తమ సమస్యలపై దృష్టి పెట్టాలని కోరినట్లు సమాచారం. ప్రొద్దుటూరులో ఈ అంశంపై మరిన్ని సమావేశాలు, చర్చలు జరపాలని నిర్ణయించినట్లు తెలిసింది.
