రాయలసీమ న్యూస్, వై.యస్.ఆర్:
దసరా ఉత్సవాల్లో ట్రాఫిక్ బందోబస్తు కట్టుదిట్టం చేయాలి: ట్రాఫిక్ సీఐ భాస్కర్ సూచనలు
ప్రొద్దటూరు: పట్టణంలో జరగనున్న దసరా ఉత్సవాలు ప్రశాంతంగా, అంతరాయం లేకుండా ముగిసేలా ట్రాఫిక్ బందోబస్తు కట్టుదిట్టంగా ఉండాలని ట్రాఫిక్ సీఐ ఎన్.భాస్కర్ సూచించారు. ఉత్సవాల సందర్భంగా విధులకు హాజరయ్యే ట్రాఫిక్ పోలీసు అధికారులు, సిబ్బంది తప్పనిసరిగా సూచనలు పాటించాలని ఆయన స్పష్టం చేశారు.
ఈ మేరకు ఆదివారం ట్రాఫిక్ విభాగానికి చెందిన సిబ్బందితో సీఐ భాస్కర్ సమావేశం నిర్వహించారు. దసరా రోజుల్లో పట్టణంలో వాహనాల రద్దీ పెరిగే అవకాశం ఉన్నందున, ముందస్తు ప్రణాళికతో ట్రాఫిక్ నియంత్రణ చర్యలు చేపట్టాలని సూచించారు. సమయానికి విధులకు హాజరై, కేటాయించిన డ్యూటీ పాయింట్లలోనే ఉండాలని, అనుమతి లేకుండా డ్యూటీ స్థలం విడిచిపెట్టరాదని సిబ్బందికి తెలిపారు.
పోలీసు యూనిఫామ్, షూస్ సక్రమంగా ధరించి, క్రమశిక్షణతో విధులు నిర్వహించాలని సీఐ భాస్కర్ ఆదేశించారు. విధుల్లో అప్రమత్తంగా ఉండి, ఎలాంటి నిర్లక్ష్యానికి తావు ఇవ్వకూడదని హెచ్చరించారు. ట్రాఫిక్‌కు అంతరాయం కలగకుండా అవసరమైన చోట ట్రాఫిక్ మళ్లింపులు చేపట్టి, వాహనాల రాకపోకలు సజావుగా సాగేందుకు తగు చర్యలు తీసుకోవాలని సూచించారు.
ఉత్సవాలకు వచ్చే ప్రజలతో మర్యాదగా, ఓర్పుతో వ్యవహరించాలని, వారికి అవసరమైన సహాయ సహకారాలు అందించాలని సిబ్బందిని ఆయన కోరారు. అనుమానాస్పద వ్యక్తులు, వస్తువులు కనిపించినప్పుడు వెంటనే ఉన్నతాధికారుల దృష్టికి తీసుకురావాలని, ఎలాంటి పరిస్థితుల్లోనూ స్వయంగా నిర్ణయాలు తీసుకోకుండా, అధికారుల సూచనల మేరకు మాత్రమే చర్యలు చేపట్టాలని సూచించారు.
విధి సమయంలో అనవసరంగా మొబైల్ ఫోన్లు ఉపయోగించరాదని, వ్యక్తిగత పనుల కోసం విధి సమయాన్ని వాడుకోవద్దని సీఐ భాస్కర్ స్పష్టం చేశారు. ఇతర విభాగాల్లో, ఇతర ప్రాంతాల్లో విధులు నిర్వహిస్తున్న పోలీసు సిబ్బందితో సమన్వయం చేసుకుంటూ పనిచేయాలని, అందరూ కలిసి పనిచేసినప్పుడే బందోబస్తు విజయవంతం అవుతుందని ఆయన పేర్కొన్నారు.
ఏదైనా సమస్య, అవాంఛనీయ సంఘటన ఎదురైన వెంటనే సంబంధిత అధికారులకు సమాచారం అందించాలని, ఆలస్యం చేయకుండా తక్షణ చర్యలు తీసుకునేలా అప్రమత్తంగా ఉండాలని సిబ్బందికి సూచించారు. బందోబస్తు విధులను ప్రతి ఒక్కరూ బాధ్యతగా, అంకితభావంతో నిర్వహిస్తేనే దసరా ఉత్సవాలు ప్రశాంతంగా, సాఫీగా జరగనున్నాయని సీఐ భాస్కర్ సమావేశంలో వివరించారు.
