రాయలసీమ న్యూస్, వై.యస్.ఆర్: ప్రొద్దుటూరు: ఎల్నినో ప్రభావంతో ఉష్ణోగ్రతలు పెరుగుతున్న నేపథ్యంలో విద్యుత్ వినియోగాన్ని జాగ్రత్తగా, ఆదా చేస్తూ ఉపయోగించాలని ప్రజలకు తిరుపతి SPDCL CGM రమణ సూచించారు. బుదవారం ప్రొద్దుటూరులో ఇంజినీరింగ్ అధికారులతో ఆయన సమావేశం నిర్వహించారు. ప్రస్తుత వాతావరణ పరిస్థితులు, పెరుగుతున్న డిమాండ్, వినియోగ విధానాలపై ఈ సమావేశంలో సమీక్ష జరిగింది.
రమణ మాట్లాడుతూ రోజురోజుకు ఉష్ణోగ్రతలు పెరుగుతున్నాయని, దాంతోపాటు గృహ, వాణిజ్య, పారిశ్రామిక రంగాల్లో విద్యుత్ ఉపకరణాల వినియోగం గణనీయంగా పెరుగుతోందని పేర్కొన్నారు. ఈ పరిస్థితుల్లో విద్యుత్ వ్యవస్థపై అదనపు భారం పడకుండా ప్రజలు వినియోగంలో జాగ్రత్తలు పాటించాలని ఆయన సూచించారు.
డిజిటల్ సేవల వినియోగంపై ప్రజలకు మరింత అవగాహన కల్పించాల్సిన అవసరాన్ని CGM రమణ ఈ సందర్భంగా ప్రస్తావించారు. బిల్లుల చెల్లింపు, ఫిర్యాదుల నమోదు, కొత్త కనెక్షన్లకు దరఖాస్తు, సేవల స్థితి తెలుసుకోవడం వంటి అంశాల్లో డిజిటల్ ప్లాట్ఫార్మ్లను వినియోగించేందుకు వినియోగదారులను ప్రోత్సహించాలని ఇంజినీరింగ్ అధికారులకు సూచించారు.
రైతులకు కొత్త సర్వీసులు అందించే విషయంలో ప్రాధాన్యత క్రమాన్ని పాటించాలని రమణ అధికారులకు సూచించారు. వ్యవసాయ రంగం రాష్ట్ర ఆర్థిక వ్యవస్థకు కీలకమైందని, సాగు నీటి అవసరాల దృష్ట్యా విద్యుత్ సరఫరాలో రైతులకు తగిన ప్రాధాన్యత ఇవ్వాలని ఆయన అభిప్రాయపడ్డారు. కొత్త కనెక్షన్ల మంజూరు, లోడ్ పెంపు, మరమ్మతు పనుల్లో రైతు వినియోగదారుల అవసరాలను ముందుగా పరిగణనలోకి తీసుకోవాలని సూచించారు.
వినియోగదారులకు నాణ్యమైన విద్యుత్ అందించడంపై ప్రత్యేక దృష్టి పెట్టాలని CGM రమణ సమావేశంలో అధికారులను ఆదేశించారు. వోల్టేజ్ మార్పులు, తరచు జరిగే ట్రిప్పింగ్, లైన్ లోపాలు వంటి సమస్యలను తగ్గించేలా ముందస్తు చర్యలు తీసుకోవాలని, నిర్వహణ పనులను సమయానికి పూర్తి చేసి వినియోగదారుల అసౌకర్యాన్ని తగ్గించాలని ఆయన పేర్కొన్నారు.
ఎల్నినో పరిస్థితుల్లో విద్యుత్ డిమాండ్ మరింత పెరిగే అవకాశం ఉన్నందున, సరఫరా వ్యవస్థను బలోపేతం చేయడంతో పాటు, వినియోగదారులు కూడా విద్యుత్ ఆదా చేయడంలో భాగస్వాములు కావాలని రమణ సూచించారు. ఈ సమావేశంలో ప్రొద్దుటూరు ప్రాంతానికి చెందిన ఇంజినీరింగ్ అధికారులు పాల్గొన్నారు.
