రాయలసీమ న్యూస్, వై.యస్.ఆర్: కడప జిల్లా ప్రొద్దుటూరు సమీపంలోని జమ్మలమడుగు బైపాస్ వద్ద ఫ్లైయాష్ బ్రిక్స్ ఇండస్ట్రీ యజమాని ఆత్మహత్యకు పాల్పడిన ఘటన స్థానికంగా కలకలం రేపింది. టీడీపీ మైనార్టీ నాయకుడిగా కూడా ఉన్న ఫాటన్ నాయబ్ రసూల్ తన స్వంత ఇండస్ట్రీలో ఉరివేసుకుని ఆత్మహత్య చేసుకున్నట్లు సమాచారం.
పోలీసులు, స్థానికుల కథనం ప్రకారం ఫ్లైయాష్ బ్రిక్స్ ఇండస్ట్రీలో పనిచేస్తున్న కూలీలు సాధారణంగా పనికి వచ్చే సమయంలో యజమాని గదికి తలుపు మూసి ఉండటం గమనించారు. పలుమార్లు తలుపు తట్టినా స్పందన లేకపోవడంతో అనుమానం వచ్చిన కూలీలు తలుపు పగులగొట్టి లోపలికి వెళ్లారు.
అక్కడ ఫాటన్ నాయబ్ రసూల్ ఉరివేసుకుని ఉండటం చూసి వెంటనే శవాన్ని కిందకు దించి బయటకు తీసుకువచ్చారు. అనంతరం హుటాహుటిన ప్రభుత్వ ఆసుపత్రికి తరలించినప్పటికీ, అప్పటికే మృతి చెందినట్లు వైద్యులు నిర్ధారించినట్లు తెలిసింది.
ఈ ఘటనపై సమాచారం అందుకున్న తాలూకా పోలీసులు సంఘటనా స్థలానికి చేరుకుని పరిశీలనలు ప్రారంభించారు. మృతదేహాన్ని పోస్టుమార్టం కోసం ప్రభుత్వ ఆసుపత్రికి తరలించారు. కుటుంబ సభ్యులు, ఇండస్ట్రీ కార్మికుల నుంచి వివరాలు సేకరిస్తున్నట్లు పోలీసులు తెలిపారు.
ఫాటన్ నాయబ్ రసూల్ మృతితో స్థానిక టీడీపీ కార్యకర్తలు, మైనార్టీ నాయకులు, వ్యాపార వర్గాల్లో దిగ్భ్రాంతి వ్యక్తమవుతోంది. ఆత్మహత్యకు గల కారణాలు ఇంకా స్పష్టంగా తెలియరాలేదు. వ్యక్తిగత, ఆర్థిక లేదా ఇతర కారణాలపై పోలీసులు అన్ని కోణాల్లో విచారణ కొనసాగిస్తున్నారు.
ఈ ఘటనపై కేసు నమోదు చేసిన తాలూకా పోలీసులు, ఫ్లైయాష్ బ్రిక్స్ ఇండస్ట్రీలోని పరిస్థితులు, ఇటీవల జరిగిన పరిణామాలపై దర్యాప్తు చేపట్టారు. పూర్తి వివరాలు వెలుగులోకి రావాల్సి ఉంది.
