రాయలసీమ న్యూస్, వై.యస్.ఆర్: గ్రామీణ ప్రాంత ప్రజలకు నాణ్యమైన కంటి వైద్య సేవలను అందించాలనే లక్ష్యంతో రోటరీ సర్వీస్ కాంప్లెక్స్ ట్రస్ట్ ప్రొద్దుటూరు, జిల్లా అంధత్వ నివారణ సొసైటీ కడప ఆధ్వర్యంలో బుధవారం కామనూరు ప్రాథమిక ఆరోగ్య కేంద్రంలో ఉచిత కంటి వైద్య పరీక్షల శిబిరాన్ని నిర్వహించారు.
రోటరీ కంటి ఆసుపత్రి అధ్యక్షుడు ఎం.వి.ఎన్. ప్రభు అధ్యక్షతన జరిగిన ఈ కార్యక్రమాన్ని ప్రొద్దుటూరు ఎమ్మెల్యే నంద్యాల వరదరాజుల రెడ్డి ప్రారంభించారు. శిబిరంలో గ్రామీణ ప్రాంతాల నుంచి పలువురు రోగులు హాజరై కంటి పరీక్షలు చేయించుకున్నారు.
ఈ సందర్భంగా ఎమ్మెల్యే నంద్యాల వరదరాజుల రెడ్డి మాట్లాడుతూ గ్రామీణ ప్రాంతాల్లో ప్రజలకు వైద్య సేవలను చేరువ చేయడంలో స్వచ్ఛంద సంస్థలు, రోటరీ సంస్థలు చేస్తున్న సేవలు అభినందనీయమని పేర్కొన్నారు. ముఖ్యంగా కంటి సంబంధిత సమస్యలను ప్రారంభ దశలోనే గుర్తించి చికిత్స అందించడం ద్వారా ప్రజలకు ఎంతో ప్రయోజనం కలుగుతుందని ఆయన తెలిపారు.
శిబిరంలో వైద్యులు కంటి చూపు, కంటి సంబంధిత సమస్యలపై మొత్తం 53 మందికి వైద్య పరీక్షలు నిర్వహించారు. పరీక్షల అనంతరం అవసరమైన వైద్య చికిత్స, శస్త్రచికిత్స అవసరమున్న 23 మందిని గుర్తించి శస్త్రచికిత్సలకు ఎంపిక చేశారు. ఎంపికైన వారికి తదుపరి దశలో అవసరమైన వైద్య సేవలు అందించనున్నట్లు నిర్వాహకులు తెలిపారు.
గ్రామీణ ప్రాంతాల్లో కంటి సమస్యలతో బాధపడుతున్న పలువురు ఆర్థిక ఇబ్బందులు, వైద్య సేవలు అందుబాటులో లేకపోవడం వంటి కారణాలతో చికిత్సకు దూరమవుతున్నారని నిర్వాహకులు పేర్కొన్నారు. అలాంటి వారికి ఉచితంగా కంటి పరీక్షలు నిర్వహించి, అవసరమైన వారికి శస్త్రచికిత్సలు అందించేందుకు ఈ తరహా శిబిరాలను నిర్వహిస్తున్నట్లు రోటరీ ప్రతినిధులు తెలిపారు.
ఈ కార్యక్రమంలో రోటరీ ఐ హాస్పిటల్ కార్యదర్శి బేపారి జాకీర్ అహ్మద్, జాయింట్ సెక్రెటరీ టి. బాలసూర్యరావు, వైద్య బృందం, రోటరీ ప్రతినిధులు, ఆరోగ్య సిబ్బంది తదితరులు పాల్గొన్నారు. శిబిరం నిర్వహణలో స్థానిక ఆరోగ్య కేంద్ర సిబ్బంది సహకారం అందించారు.
