రాయలసీమ న్యూస్, వై.యస్.ఆర్: ప్రొద్దుటూరు పట్టణంలో శుక్రవారం ఆహార భద్రతా నియమాల ఉల్లంఘనపై అధికారుల చర్యలు చోటుచేసుకున్నాయి. జిల్లా ఫుడ్ సేఫ్టీ కంట్రోల్ అధికారి హరిత ఆధ్వర్యంలో స్థానిక హోటళ్లపై తనిఖీలు నిర్వహించారు. ఈ సందర్భంగా రామేశ్వరం రోడ్డులో ఉన్న గణేష్ టిఫిన్ సెంటర్పై అధికారులు ప్రత్యేకంగా దృష్టి సారించారు.
గణేష్ టిఫిన్ సెంటర్లో పూరీ చట్నీలో బల్లి కనిపించిందని వినియోగదారులు ఆరోపించారు. ఈ విషయాన్ని బాధితులు ప్రొద్దుటూరు 1-టౌన్ PSలో ఫిర్యాదు చేశారు. వినియోగదారుల ఫిర్యాదును స్వీకరించిన సీఐ కొండారెడ్డి వెంటనే జిల్లా ఫుడ్ సేఫ్టీ అధికారులకు సమాచారం అందించారు.
ఫిర్యాదు ఆధారంగా ఫుడ్ సేఫ్టీ బృందం గణేష్ టిఫిన్ సెంటర్ను తనిఖీ చేసింది. తనిఖీల అనంతరం ఆహార భద్రతా ప్రమాణాలు ఉల్లంఘించబడినట్లు గుర్తించిన అధికారులు టిఫిన్ సెంటర్ లైసెన్స్ను తాత్కాలికంగా రద్దు చేశారు. అదనంగా రూ.15 వేలు పెనాల్టీ విధించారు.
తనిఖీల ఫలితంగా గణేష్ టిఫిన్ సెంటర్ను అధికారులు సీజ్ చేశారు. వినియోగదారుల ఆరోగ్య భద్రతకు విరుద్ధంగా వ్యవహరించినందుకు ఈ చర్యలు తీసుకున్నట్లు ఫుడ్ సేఫ్టీ విభాగం పేర్కొంది. సంఘటనపై మరిన్ని వివరాలు సేకరిస్తున్నట్లు సంబంధిత అధికారులు తెలిపారు.
స్థానికంగా ఈ ఘటన కలకలం రేపింది. ఆహార పదార్థాల పరిశుభ్రత, భద్రతపై వినియోగదారులు ఆందోళన వ్యక్తం చేస్తున్నారు. ఫుడ్ సేఫ్టీ విభాగం తరచూ తనిఖీలు నిర్వహించి, నియమాలు ఉల్లంఘించే హోటళ్లపై కఠిన చర్యలు తీసుకోవాలని ప్రజలు కోరుతున్నారు.
