రాయలసీమ న్యూస్, వై.యస్.ఆర్: కడప జిల్లా ప్రాథమిక ఆరోగ్య కేంద్రాల్లో ప్రజలకు వైద్య సేవలతో పాటు ఆరోగ్య అవగాహనను పెంపొందించేందుకు జిల్లా వైద్య ఆరోగ్య శాఖ కొత్త విధానాన్ని అమలు చేస్తోంది. జిల్లా వైద్య ఆరోగ్య శాఖాధికారి డా. పి. యుగంధర్ ఆలోచనతో ప్రాథమిక ఆరోగ్య కేంద్రాలు, పట్టణ ప్రాథమిక ఆరోగ్య కేంద్రాల్లో టీవీలను ఏర్పాటు చేసి, రోగులు ఆసుపత్రిలో గడిపే వేచి ఉండే సమయాన్ని ఆరోగ్య విద్యకు వినియోగించేలా చర్యలు చేపట్టారు.
ప్రస్తుతం యూపీహెచ్‌సీ క్రాంతినగర్, ఎర్రగుంట్లలో ఈ కార్యక్రమాన్ని అమలు చేస్తున్నారు. వైద్యుల సేవల కోసం వేచి ఉండే సమయంలో రోగులు, వారి సహాయకులు టీవీల ద్వారా వివిధ ఆరోగ్య అంశాలపై రూపొందించిన సందేశాలను వీక్షిస్తున్నారు. వీటిలో HPV వ్యాక్సినేషన్, క్యాన్సర్ నివారణ, పారిశుధ్యం, పోషకాహారం, అంటువ్యాధుల నివారణ, తల్లి–శిశు ఆరోగ్యం వంటి అంశాలు సులభంగా అర్థమయ్యే రూపంలో ప్రసారం అవుతున్నాయి.
వైద్య ఆరోగ్య శాఖ వర్గాల సమాచారం ప్రకారం, ఆసుపత్రికి వచ్చే ప్రతి వ్యక్తి కనీసం ఒక ఆరోగ్య సందేశాన్ని తెలుసుకుని ఇంటికి వెళ్లాలనే ఆలోచనతో ఈ కార్యక్రమాన్ని రూపకల్పన చేశారు. సాధారణంగా ఆసుపత్రుల్లో వైద్యులను, పరీక్షల ఫలితాలను ఎదురుచూస్తూ గడిపే సమయం వృథా కాకుండా, అదే సమయాన్ని ఆరోగ్య విద్యకు వినియోగించడం ద్వారా ప్రజల్లో అవగాహన పెంపొందించాలనే లక్ష్యంతో ఈ చర్యలు తీసుకున్నారు.
అధికారుల అభిప్రాయం ప్రకారం, ఈ విధానం ద్వారా ప్రజల్లో ఆరోగ్యకరమైన జీవనశైలిపై ఆసక్తి పెరగడంతో పాటు, వ్యాధుల నివారణపై అవగాహన పెరుగుతుంది. ప్రాథమిక స్థాయిలోనే “చికిత్సతో పాటు ఆరోగ్య విద్య” అనే భావనను బలపరచేందుకు జిల్లా వైద్య ఆరోగ్య శాఖ ఈ కార్యక్రమాన్ని విస్తృతంగా అమలు చేయాలని భావిస్తోంది.
యూపీహెచ్‌సీ క్రాంతినగర్, ఎర్రగుంట్లలో ఇప్పటికే ఏర్పాటు చేసిన టీవీల ద్వారా రోగులు, వారి కుటుంబ సభ్యులు ఆరోగ్య సందేశాలను ఆసక్తిగా వీక్షిస్తున్నట్లు ఆరోగ్య శాఖ వర్గాలు పేర్కొన్నాయి. భవిష్యత్తులో మరిన్ని ప్రాథమిక ఆరోగ్య కేంద్రాల్లో కూడా ఈ విధానాన్ని అమలు చేయడానికి చర్యలు కొనసాగుతున్నాయి.
