రాయలసీమ న్యూస్, వై.యస్.ఆర్: ప్రొద్దుటూరు: జిల్లా ఇన్‌చార్జి మంత్రి సవితమ్మ ఆదివారం ప్రొద్దుటూరు ఆర్‌అండ్‌బీ అతిథి గృహంలో నిర్వహించిన సమీక్షా సమావేశంలో జల్‌జీవన్‌ మిషన్‌ కార్యక్రమంపై వివరాలు వెల్లడించారు. ప్రొద్దుటూరు వేదికగా సుమారు రూ.30 వేల కోట్ల అంచనా వ్యయంతో జల్‌జీవన్‌ మిషన్‌ కార్యక్రమాన్ని రాష్ట్రవ్యాప్తంగా ప్రారంభించనున్నట్లు ఆమె తెలిపారు.
ఈ కార్యక్రమానికి ముఖ్యమంత్రి నారా చంద్రబాబు నాయుడు, డిప్యూటీ సీఎం పవన్‌ కళ్యాణ్‌, రాష్ట్ర బీజేపీ అధ్యక్షుడు మాధవ్‌ హాజరుకానున్నారని మంత్రి సవితమ్మ చెప్పారు. ప్రారంభోత్సవ కార్యక్రమానికి సుమారు లక్ష మంది వరకు ప్రజలు తరలిరానున్నట్లు అంచనా వేస్తున్నామని ఆమె వివరించారు.
కూటమి ప్రభుత్వం సూపర్‌ సిక్స్‌ హామీల అమలుతో పాటు సంక్షేమ పథకాలు, పారిశ్రామికాభివృద్ధి, పోలవరం, అమరావతి వంటి కీలక కార్యక్రమాలను ముందుకు తీసుకెళ్తోందని సవితమ్మ పేర్కొన్నారు. కడప జిల్లాకు ఇప్పటికే సుమారు రూ.1,500 కోట్ల నిధులు వచ్చినట్లు తెలిపారు.
జల్‌జీవన్‌ మిషన్‌ ద్వారా పులివెందుల ప్రాంతానికి తాగునీటితో పాటు సాగునీరు అందించే చర్యలు చేపడుతున్నామని మంత్రి వివరించారు. హార్టికల్చర్‌ హబ్‌ ఏర్పాటుతో రాయలసీమలో ఉద్యానవన రంగానికి మరింత ప్రోత్సాహం లభిస్తుందని చెప్పారు. బీసీలకు 34 శాతం రిజర్వేషన్ల అమలుకు ప్రభుత్వం చర్యలు తీసుకుంటోందని సవితమ్మ వెల్లడించారు.
ఎమ్మెల్యే నంద్యాల వరదరాజులరెడ్డి జల్‌జీవన్‌ మిషన్‌ ప్రారంభోత్సవ ఏర్పాట్లపై మాట్లాడారు. జల్‌జీవన్‌ మిషన్‌ వంటి కీలక కార్యక్రమాన్ని ప్రొద్దుటూరు నుంచి రాష్ట్రవ్యాప్తంగా ప్రారంభించడం పట్ల సంతోషం వ్యక్తం చేశారు. ఎన్నికల సమయంలో ఇచ్చిన హామీలతో పాటు ప్రజలకు అవసరమైన మరిన్ని కార్యక్రమాలను ప్రభుత్వం అమలు చేస్తోందని ఆయన తెలిపారు.
కూటమి ప్రభుత్వ చీఫ్‌ విప్‌ జి.వి. ఆంజనేయులు గ్రామీణాభివృద్ధి కార్యక్రమాలపై మాట్లాడారు. డిప్యూటీ సీఎం పవన్‌ కళ్యాణ్‌ నేతృత్వంలో గ్రామీణ ప్రాంతాల్లో అభివృద్ధి పనులు కొనసాగుతున్నాయని ఆయన చెప్పారు. పల్లె పండుగ-1, పల్లె పండుగ-2 ద్వారా గ్రామాల్లో అనేక అభివృద్ధి పనులు చేపట్టామని, పల్లె పండుగ-3 కార్యక్రమాన్ని కూడా నిర్వహించనున్నట్లు వివరించారు.
జల్‌జీవన్‌ మిషన్‌ ప్రారంభోత్సవాన్ని ఎన్డీయే నాయకులు, కార్యకర్తలు సమన్వయంతో విజయవంతం చేయాలని జి.వి. ఆంజనేయులు పిలుపునిచ్చారు. ఈ సమావేశంలో రాష్ట్ర టీడీపీ ప్రధాన కార్యదర్శి ఎన్.ఎం.డి. ముక్తియార్‌, జిల్లా టీడీపీ అధ్యక్షుడు భూపేష్‌ సుబ్బరామిరెడ్డి, జిల్లా టీడీపీ ప్రధాన కార్యదర్శి జబీవుల్లా, జోనల్‌ ఇన్‌చార్జి శ్రీనివాసరెడ్డి, జిల్లా బీజేపీ అధ్యక్షుడు జంగిటి వెంకటసుబ్బారెడ్డి, జనసేన జిల్లా నాయకుడు జి.వి. రమణ తదితరులు పాల్గొన్నారు.
