రాయలసీమ న్యూస్, వై.యస్.ఆర్:
ప్రొద్దుటూరులో 30 వేల కోట్ల "జల జీవన్ మిషన్" పనులకు శంకుస్థాపనకు
ప్రొద్దుటూరు: రాష్ట్ర ప్రభుత్వం ఒకవైపు "సూపర్ సిక్స్" పథకాలను అమలు చేస్తూనే, మరోవైపు పరిశ్రమలు, ఇరిగేషన్ పనులు, "అమృత్" పనులను వేగంగా ముందుకు తీసుకెళ్తోంది. సంక్షేమం, అభివృద్ధి రెండింటినీ సమాంతరంగా కొనసాగించే దిశగా ఇటీవల "పల్లె పండుగ", "హార్టికల్చర్ హబ్" వంటి అనేక కార్యక్రమాలను చేపట్టినట్లు అధికార వర్గాలు వెల్లడించాయి.
ఈ నెల 5వ తేదీన ప్రొద్దుటూరులో 30,000 కోట్ల రూపాయల విలువైన "జల జీవన్ మిషన్" పనులకు శంకుస్థాపన చేయనున్నారు. ఈ కార్యక్రమానికి ముఖ్యమంత్రి చంద్రబాబు నాయుడు, డిప్యూటీ సీఎం పవన్ కళ్యాణ్, బీజేపీ రాష్ట్ర అధ్యక్షురాలు మాధవ్ హాజరుకానున్నారు. వారి చేతుల మీదుగా ఈ భారీ ప్రాజెక్టుకు శంకుస్థాపన జరగనుండటంతో జిల్లా, స్థానిక అధికార యంత్రాంగం ఏర్పాట్లను వేగవంతం చేసింది.
ఈ నేపథ్యంలో సీనియర్ మంత్రులు నారాయణ, బీసీ జనార్దన్ రెడ్డి, కలెక్టర్, ఎస్పీతో పాటు సంబంధిత శాఖల అధికారులు కలిసి విస్తృత స్థాయి ఏర్పాట్లను పరిశీలించారు. సభా ప్రాంగణం, రహదారి మార్గాలు, పార్కింగ్, భద్రతా ఏర్పాట్లు, ఇతర సౌకర్యాలపై సమీక్ష నిర్వహించారు.
సభకు వచ్చే ప్రజలు, కార్యకర్తలకు ఎలాంటి అసౌకర్యం కలగకుండా అన్ని వసతులు కల్పించేందుకు చర్యలు తీసుకున్నట్లు అధికార వర్గాలు తెలిపాయి. ట్రాఫిక్ ఇబ్బందులు లేకుండా ఉండేందుకు ప్రత్యేక ప్రణాళికను రూపొందించారు. వాహనాల రాకపోకలకు ప్రత్యామ్నాయ మార్గాలు, పార్కింగ్ స్థలాలు, ట్రాఫిక్ నియంత్రణ కోసం అదనపు సిబ్బందిని నియమించనున్నట్లు సమాచారం.
సభా ప్రాంగణం చుట్టుపక్కల వైద్య సదుపాయాలు, అత్యవసర సేవలు, తాగునీరు, మరుగుదొడ్లు, విద్యుత్ వంటి సౌకర్యాలను పక్కాగా ఏర్పాటు చేశారు. భారీ జనసమ్మర్థం ఉండే అవకాశం దృష్ట్యా అంబులెన్సులు, వైద్య బృందాలను సిద్ధంగా ఉంచేలా ఆరోగ్య శాఖ చర్యలు తీసుకుంది.
కూటమి ప్రభుత్వం ఇచ్చే మాటలకు, చేసే పనులకు కట్టుబడి పనిచేస్తోందని ప్రజలు సంతోషం వ్యక్తం చేస్తున్నట్లు అధికార వర్గాలు పేర్కొన్నాయి. సంక్షేమ పథకాల అమలు, అభివృద్ధి పనుల పురోగతితో పాటు "జల జీవన్ మిషన్" వంటి పెద్ద ప్రాజెక్టులు ప్రారంభం కావడం ప్రజల్లో నమ్మకాన్ని పెంచుతోందని స్థానిక నేతలు అభిప్రాయపడుతున్నారు.
