రాయలసీమ న్యూస్, వై.యస్.ఆర్: కడప జిల్లాను పోషకాహార లోపం లేని జిల్లాగా తీర్చిదిద్దడమే లక్ష్యంగా అన్ని శాఖలు సమన్వయంతో పనిచేయాలని జిల్లా కలెక్టర్ డా. శ్రీధర్ చెరుకూరి పేర్కొన్నారు. అంగన్‌వాడీ, ఆశా కార్యకర్తలు, ఆరోగ్య, మహిళా శిశు సంక్షేమ శాఖల క్షేత్రస్థాయి సిబ్బంది గత కొన్నేళ్లుగా చేస్తున్న సమష్టి కృషి వల్ల ఆరోగ్యం, పోషణకు సంబంధించిన సూచీల్లో జిల్లాలో గణనీయమైన పురోగతి నమోదైందని ఆయన వివరించారు.
బుధవారం కలెక్టరేట్‌లోని సభాభవన్‌లో జిల్లా మహిళా, శిశు సంక్షేమ, సాధికారత శాఖ ఆధ్వర్యంలో నిర్వహించిన 9వ జాతీయ పోషణ మాసం–2026 జిల్లా స్థాయి కార్యక్రమానికి ముఖ్య అతిథిగా జిల్లా కలెక్టర్ డా. శ్రీధర్ చెరుకూరి, జాయింట్ కలెక్టర్ డా. నిధి మీనా హాజరయ్యారు. జిల్లాలో పోషణ మాసం విజయవంతంగా కొనసాగేందుకు చేపట్టిన చర్యలను వారు అభినందించారు.
సెప్టెంబర్ 9 నుంచి అక్టోబర్ 8 వరకు నెల రోజుల పాటు నిర్వహిస్తున్న "పోషణ మాసం" కేవలం ప్రభుత్వ శాఖల కార్యక్రమంగా కాకుండా ప్రజలందరి భాగస్వామ్యంతో నిర్వహించాల్సిన సామాజిక ఉద్యమంగా భావించాలి.
చిన్నారులు, గర్భిణీలు, బాలింతలకు సమతుల్యమైన పోషకాహారం అందించడం, రక్తహీనతను తగ్గించడం, తల్లులు, పిల్లల్లో ఆరోగ్యంపై అవగాహన పెంచడం, బాలల సమగ్ర వికాసానికి అవసరమైన వాతావరణం కల్పించడం వంటి అంశాలపై క్షేత్రస్థాయిలో చేపట్టిన నిరంతర చర్యలు అభినందనీయమని కలెక్టర్ పేర్కొన్నారు.
ఆకాంక్ష జిల్లా, ఆకాంక్ష మండల కార్యక్రమాల్లో ఆరోగ్యం, పోషణ అంశాలకు అత్యంత ప్రాధాన్యం ఉందని, ఈ అంశాల్లో కడప జిల్లా వరుస త్రైమాసికాల్లో దేశంలో అగ్రస్థానంలో నిలవడం వెనుక క్షేత్రస్థాయి సిబ్బంది అంకితభావం, పటిష్టమైన అమలు విధానం ప్రధాన కారణమని ఆయన తెలిపారు. ఈ విజయానికి కృషి చేస్తున్న జిల్లా యంత్రాంగం, అంగన్‌వాడీ, ఆశా కార్యకర్తలు, ఇతర క్షేత్రస్థాయి సిబ్బందిని అభినందించారు.
ఆరోగ్యం, పోషణ రెండు వేర్వేరు అంశాలు కాకుండా పరస్పరం అనుసంధానమై ఉంటాయని కలెక్టర్ వివరించారు. తల్లి ఆరోగ్యం, శిశువు ఆరోగ్యం, చిన్నారుల ఎదుగుదలతో పాటు పెద్దల ఆరోగ్యానికి కూడా సమతుల్యమైన, సంపూర్ణమైన పోషకాహారమే పునాదిగా పనిచేస్తుందని చెప్పారు. ముఖ్యమైన పోషకాల్లో ఏదైనా లోపిస్తే పిల్లల శారీరక, మానసిక ఎదుగుదలతో పాటు వారి అభివృద్ధిపై ప్రతికూల ప్రభావం పడే అవకాశం ఉందని హెచ్చరించారు.
అంగన్‌వాడీ కేంద్రాల ద్వారా సమతుల్యమైన పోషకాహారాన్ని అందించేందుకు ప్రభుత్వం ఇప్పటికే పటిష్టమైన వ్యవస్థను ఏర్పాటు చేసిందని, అందించే ఆహార నాణ్యత, పంపిణీ, అమలును నిరంతరం పర్యవేక్షించే విధానాలు అమల్లో ఉన్నాయని తెలిపారు. అయితే పోషకాహారం అందించడంతో పాటు కుటుంబాల్లో ఆహారపు అలవాట్లలో మార్పు తీసుకురావడం కూడా అత్యంత ముఖ్యమని చెప్పారు.
పిల్లలకు ఏం తినాలో చెప్పడంతో పాటు ఏం తినకూడదో కూడా స్పష్టంగా తెలియజేయాల్సిన అవసరం ఉందని కలెక్టర్ సూచించారు. ప్రస్తుతం శుద్ధి చేసిన ఆహార పదార్థాలు, అధిక తయారీ ప్రక్రియకు గురైన చిరుతిళ్లు, శీతల పానీయాలు, బిస్కెట్లు, చాక్లెట్లు తదితరాలకు చిన్నారులు ఆకర్షితులవుతున్నారని, ఇలాంటి పదార్థాల్లో సహజ పోషక విలువలు తక్కువగా ఉండే అవకాశం ఉందని వివరించారు. అధిక తయారీ ప్రక్రియ కారణంగా పీచు వంటి ముఖ్యమైన పోషకాలు తగ్గిపోతాయని చెప్పారు. అందువల్ల పిల్లలకు ఇటువంటి ఆహార పదార్థాల వినియోగాన్ని తగ్గించి సహజమైన, స్థానికంగా లభించే పోషకాహారాన్ని అలవాటు చేయాలని సూచించారు.
మంచి ఆహారపు అలవాట్లను చిన్న వయస్సు నుంచే పిల్లలకు నేర్పించాల్సిన అవసరం ఉందని కలెక్టర్ పేర్కొన్నారు. ముఖ్యంగా రెండు నుంచి ఐదేళ్ల వయస్సు వరకు ఆటలు, కథలు, మాటలు, బొమ్మలు వంటి సులభమైన పద్ధతుల ద్వారా ఆరోగ్యకరమైన ఆహారం, అనారోగ్యకరమైన ఆహారం మధ్య తేడాను వివరించాలని సూచించారు. చిన్న వయస్సులో తల్లిదండ్రులు, ఉపాధ్యాయులు, అంగన్‌వాడీ కార్యకర్తలు చెప్పే విషయాలు పిల్లల మనసుల్లో బలంగా నాటుకుపోతాయని, ఈ దశలో కల్పించే అవగాహన వారి జీవితాంతం ప్రభావం చూపుతుందని అన్నారు.
స్థానికంగా తక్కువ ఖర్చుతో లభించే పోషకాహారాన్ని కుటుంబాలు ఎక్కువగా వినియోగించుకోవాలని కలెక్టర్ సూచించారు. ముఖ్యంగా బొప్పాయి తక్కువ ఖర్చుతో విటమిన్ ఎ, సి వంటి ముఖ్యమైన పోషకాలను అందించే మంచి పండు అని, ఇలాంటి స్థానిక పండ్లు, కూరగాయలు, ఆకుకూరలు, పప్పుధాన్యాలు తదితరాలను రోజువారీ ఆహారంలో భాగం చేయాలని ఆయన సూచించారు.
ఆంధ్రప్రదేశ్‌తో పాటు దక్షిణ భారతదేశంలో బియ్యం ఆధారిత ఆహారం ఎక్కువగా తీసుకునే అలవాటు వల్ల ఆహారంలో కార్బోహైడ్రేట్ల శాతం అధికంగా ఉండే అవకాశం ఉందని కలెక్టర్ వివరించారు. బియ్యం ద్వారా శరీరానికి అవసరమైన శక్తి లభించినప్పటికీ, కేవలం శక్తిని అందించే ఆహారంతో సంపూర్ణ పోషణ సాధ్యం కాదని చెప్పారు. ముఖ్యంగా పిల్లలు, గర్భిణీలు, బాలింతలకు శరీర నిర్మాణం, ఎదుగుదల కోసం ప్రోటీన్ తగిన మోతాదులో అందాల్సిన అవసరం ఉందని, మెదడు అభివృద్ధికి అవసరమైన ఆరోగ్యకరమైన కొవ్వు పదార్థాలు, ఒమేగా కొవ్వు ఆమ్లాలు కూడా ఆహారంలో ఉండేలా వైవిధ్యం అవసరమని సూచించారు.
అన్నంతో పాటు కొద్దిపాటి కూర లేదా పప్పుతో భోజనం పూర్తయిందని భావించకుండా ధాన్యాలు, పప్పులు, కూరగాయలు, ఆకుకూరలు, పండ్లు, గుడ్లు, పాలు తదితర పోషక పదార్థాలను సమతుల్యంగా ఆహారంలో చేర్చుకోవాలని ఆయన సూచించారు. ముఖ్యంగా పిల్లల ఆహారంలో ప్రోటీన్, విటమిన్లు, ఖనిజ లవణాలు, ఆరోగ్యకరమైన కొవ్వు పదార్థాలు తగిన మోతాదులో ఉండేలా తల్లిదండ్రులు శ్రద్ధ వహించాలని అన్నారు.
పిల్లల జీవితంలో తొలి రెండేళ్లు మెదడు అభివృద్ధికి అత్యంత కీలకమైన దశ అని కలెక్టర్ వివరించారు. పుట్టిన తర్వాత తొలి 15–18 నెలల్లో మెదడు అభివృద్ధి వేగంగా జరుగుతుందని, ఐదేళ్ల వరకు కూడా ఈ అభివృద్ధి కొనసాగుతుందని చెప్పారు. ఈ దశలో అవసరమైన పోషకాలు సరైన మోతాదులో అందకపోతే పిల్లల శారీరక, మానసిక, మేధో వికాసంపై ప్రభావం పడే అవకాశం ఉందని హెచ్చరించారు.
అంగన్‌వాడీ కేంద్రాలను మరింత బలోపేతం చేసి, ప్రతి చిన్నారికి మెరుగైన పోషకాహారం, ఆరోగ్యం, ప్రాథమిక విద్య, సురక్షిత వాతావరణం అందించడంతో పాటు పోషకాహార లోపం లేని, ఆరోగ్యకరమైన తరాన్ని తీర్చిదిద్దడమే లక్ష్యంగా అన్ని శాఖలు సమన్వయంతో పనిచేయాలని జిల్లా కలెక్టర్ డా. శ్రీధర్ చెరుకూరి పిలుపునిచ్చారు.
“మన అంగన్‌వాడీ–మన బాధ్యత” అనే భావనను ప్రజల్లోకి విస్తృతంగా తీసుకెళ్లాలి. అంగన్‌వాడీ కేంద్రాల అభివృద్ధి కేవలం మహిళా, శిశు సంక
