రాయలసీమ న్యూస్, వై.యస్.ఆర్: ప్రొద్దుటూరు: కేసులను పరస్పర రాజీ ద్వారా ముగించుకునేలా ప్రజలు ముందుకు రావాలని న్యాయవర్గం సూచించింది. ప్రొద్దుటూరు మొదటి జిల్లా అదనపు జడ్జి సత్యకుమారి ఆధ్వర్యంలో కోర్టు కార్యాలయంలో శనివారం సమావేశం జరిగింది.
ఈ నెల 12న జరగనున్న లోక్ అదాలత్కు సంబంధించి చేపట్టాల్సిన ఏర్పాట్లు, పరిష్కరించదగిన కేసుల ఎంపికపై ఈ సమావేశంలో చర్చించారు. సహచర జడ్జీలు, పోలీసు అధికారులు, బ్యాంకు, ఇన్స్యూరెన్స్ సంస్థల మేనేజర్లు, న్యాయవాదులతో సత్యకుమారి సమీక్ష నిర్వహించారు.
లోక్ అదాలత్ లక్ష్యం, విధివిధానాలు, ప్రజలకు కలిగే ప్రయోజనాలపై సమావేశంలో వివరణ ఇచ్చారు. ఎక్కువ కాలంగా నడుస్తున్న చిన్న చిన్న వివాదాలు, ఆర్థిక లావాదేవీలకు సంబంధించిన కేసులు, బ్యాంకు, ఇన్స్యూరెన్స్ క్లెయిమ్లు వంటి వాటిని రాజీ ద్వారా త్వరగా పరిష్కరించుకోవచ్చని న్యాయవర్గం అభిప్రాయపడింది.
రాజీకి అనుకూలమైన కేసులను గుర్తించి, సంబంధిత పక్షాలతో ముందస్తు చర్చలు జరిపి, లోక్ అదాలత్ రోజున తుది పరిష్కారం దిశగా చర్యలు తీసుకోవాలని అధికారులు నిర్ణయించారు. కోర్టు వెలుపల సఖ్యపూర్వకంగా వివాదాలు ముగిస్తే, సమయం, ఖర్చు రెండూ ఆదా అవుతాయని న్యాయవాదులు సూచించారు.
సమావేశంలో జడ్జీలు వెంకటేశ్వర్లు, సురేంద్ర రెడ్డి, బార్ అసోసియేషన్ ప్రెసిడెంట్, ASP విభూకృష్ణ పాల్గొన్నారు. లోక్ అదాలత్ రోజున సంబంధిత శాఖల అధికారులు, న్యాయవాదులు సమన్వయంతో పనిచేసి, ఎక్కువ సంఖ్యలో కేసులను రాజీ ద్వారా పరిష్కరించేందుకు కృషి చేయాలని నిర్ణయించారు.
