రాయలసీమ న్యూస్, వై.యస్.ఆర్: ప్రొద్దుటూరు పట్టణంలో మున్సిపల్ ఆస్తులు, కాలువల పరిరక్షణపై తీవ్ర విమర్శలు వెల్లువెత్తుతున్నాయి. ప్రజల అవసరాల కోసం ఉన్న మున్సిపల్ ఆస్తులపైనే కొందరు మున్సిపల్ కాంట్రాక్టర్ల కన్ను పడిందన్న ఆరోపణలు స్థానికంగా కలకలం రేపుతున్నాయి. మున్సిపల్ పనులు చేసే వారే మున్సిపల్ ఆస్తుల పరిధిలో నిర్మాణాలు చేపడుతున్నారన్న ఆరోపణలు నిజమైతే ఇది ప్రయోజనాల ఘర్షణ కాదా అని ప్రజా సంఘాలు ప్రశ్నిస్తున్నాయి.
మడూరు కాలువ పరిధిలో జరుగుతున్నట్లు చెబుతున్న నిర్మాణాలపై స్థానికులు, ప్రజా సంఘాలు తీవ్ర అభ్యంతరం వ్యక్తం చేస్తున్నారు. కాలువ హద్దులు ఎక్కడివరకు ఉన్నాయి? నిర్మాణాలకు ఎవరు అనుమతులు ఇచ్చారు? స్థలానికి సంబంధించిన మున్సిపల్ రికార్డుల్లో ఏం నమోదు ఉంది? కాలువపై లేదా కాలువను ఆనుకుని నిర్మాణాలకు నిబంధనలు అనుమతిస్తున్నాయా? అనే అంశాలపై అధికారులు బహిరంగంగా స్పష్టత ఇవ్వాలని వారు డిమాండ్ చేస్తున్నారు.
కాలువలు ఆక్రమణలకు గురైతే నష్టపోయేది ఒక్క మున్సిపాలిటీ కాదు, వర్షాలు, మురుగునీటి ప్రవాహం సమయంలో ఇబ్బందులు ఎదుర్కొనేది సామాన్య ప్రజలేనని స్థానికులు ఆవేదన వ్యక్తం చేస్తున్నారు. మున్సిపల్ పనులు చేపట్టే కాంట్రాక్టర్లు కూడా ఇతరుల్లాగే నిబంధనలు పాటించాల్సిందేనని ప్రజా సంఘాలు స్పష్టం చేస్తున్నాయి. కాంట్రాక్టర్ హోదా అధికారాలకు దగ్గరగా ఉండటానికి కాదు, బాధ్యతగా వ్యవహరించడానికి అని గుర్తించాల్సిన అవసరం ఉందని వారు సూచిస్తున్నారు.
మున్సిపల్ ఆస్తులు, కాలువలు, ప్రజా స్థలాల విషయంలో ఎవరికైనా ప్రత్యేక మినహాయింపులు ఉంటే వాటిని అధికారులు ప్రజలకు వెల్లడించాలని ప్రజా సంఘాలు కోరుతున్నారు.
“సామాన్యుడు నిర్మాణం చేస్తే నోటీసులు.. కాంట్రాక్టర్ చేస్తే మౌనం ఎందుకు?”
అని వారు ప్రశ్నిస్తున్నారు.
కాలువ పరిధిలో నిర్మాణాలు మున్సిపల్ నిబంధనలకు విరుద్ధంగా ఉన్నట్లు అధికారుల స్థల పరిశీలనలో తేలితే, నిర్మాణాలను తొలగించడంతో పాటు బాధ్యులపై చట్టపరమైన చర్యలు తీసుకోవాలని ప్రజా సంఘాలు డిమాండ్ చేస్తున్నారు. అంతేకాకుండా సంబంధిత కాంట్రాక్టర్ మున్సిపల్ నిబంధనలు ఉల్లంఘించినట్లు అధికారికంగా నిర్ధారణ అయితే, కాంట్రాక్టర్ లైసెన్స్‌ను నిబంధనల ప్రకారం రద్దు చేయడంతో పాటు భవిష్యత్తులో మున్సిపల్ కాంట్రాక్టుల్లో పాల్గొనే అర్హతపై కూడా నిబంధనల మేరకు చర్యలు తీసుకోవాలని వారు కోరుతున్నారు.
మడూరు కాలువపై జరుగుతున్న నిర్మాణాల విషయంలో మున్సిపల్ అధికారులు ఇప్పటివరకు ఏం పరిశీలించారు? ఎవరి అనుమతులతో నిర్మాణాలు జరుగుతున్నాయి? కాలువ హద్దులను అధికారులు ఎప్పుడు నిర్ధారించారు? అనే ప్రశ్నలకు సమాధానాలు ఇవ్వాల్సిన అవసరం ఉందని ప్రజా సంఘాలు అంటున్నాయి.
“మున్సిపల్ ఆస్తులను కాపాడాల్సిన వ్యవస్థే మౌనం వహిస్తే.. ప్రజలు ఎవరిని ఆశ్రయించాలి?”
అని వారు ప్రశ్నిస్తున్నారు.
మున్సిపల్ కమిషనర్ తక్షణమే స్థల పరిశీలన నిర్వహించి, మడూరు కాలువ హద్దులను అధికారికంగా నిర్ధారించి, నిర్మాణాలకు సంబంధించిన అనుమతులు, రికార్డులు పరిశీలించాలని ప్రజలు కోరుతున్నారు. నిబంధనలకు విరుద్ధంగా నిర్మాణాలు ఉన్నట్లు తేలితే, నిర్మాణాల తొలగింపు, బాధ్యులపై చట్టపరమైన చర్యలు, అవసరమైతే సంబంధిత కాంట్రాక్టర్ లైసెన్స్ రద్దు వరకు కఠిన చర్యలు తీసుకోవాలని వారు డిమాండ్ చేస్తున్నారు.
