రాయలసీమ న్యూస్, వై.యస్.ఆర్: ప్రొద్దుటూరు మండలం పరిధిలోని హౌసింగ్ బోర్డు కాలనీలో ఉన్న మండల పరిషత్ అభివృద్ధి కార్యాలయంలో మండల ప్రజా పరిషత్ సర్వసభ్య సమావేశం జరిగింది. ఈ సమావేశంలో ఎమ్మెల్యే నంద్యాల వరదరాజుల రెడ్డి పాల్గొన్నారు. సమావేశం సందర్భంగా సబ్సిడీ ద్వారా అందించే మినుములను రైతులకు పంపిణీ చేశారు.
ఎల్ నినో ప్రభావం కారణంగా వర్షాభావ పరిస్థితులు నెలకొన్న నేపథ్యంలో పశువులకు నీటి కొరత రాకుండా ముందస్తు చర్యలు తీసుకోవాలని ఎమ్మెల్యే వరదరాజుల రెడ్డి అధికారులను ఆదేశించారు. గ్రామాలన్నింటిలో ప్రజలకు సరిపడే త్రాగునీరు అందుబాటులో ఉండేలా తగిన ఏర్పాట్లు చేయాలని సూచించారు.
గ్రామాల్లో రహదారులు, కాలువల పనులను వేగంగా పూర్తి చేయాలని, ఈ పనుల్లో ఆలస్యం జరగకుండా చూడాలని ఆయన అధికారులకు సూచించారు. అలాగే కరెంట్ సరఫరాలో అంతరాయం లేకుండా చర్యలు తీసుకోవాలని, గ్రామీణ ప్రాంతాల్లో విద్యుత్ సమస్యలు తలెత్తకుండా ముందస్తు ప్రణాళికతో పనిచేయాలని అధికారులను ఆదేశించారు.
మండల పరిషత్ అభివృద్ధి కార్యక్రమాలు, ప్రస్తుత పరిస్థితులు, గ్రామాల వారీగా అవసరాలపై సమావేశంలో చర్చ జరిగింది. ప్రజలకు అవసరమైన మౌలిక సదుపాయాల కల్పన, త్రాగునీరు, విద్యుత్, రహదారులు, కాలువల పనుల పురోగతిపై అధికారులు వివరాలు అందించారు.
ఈ కార్యక్రమంలో MPDO సూర్యనారాయణ రెడ్డి, MRO ఉదయ భాస్కర్ రాజు, మార్కెట్ కమిటీ ఇంచార్జ్ చైర్మన్ పట్నం లక్ష్మణ్ కుమార్, అన్ని శాఖల అధికారులు, ప్రజా ప్రతినిధులు పాల్గొన్నారు. మండల పరిషత్ పరిధిలో అభివృద్ధి పనులను సమర్థవంతంగా అమలు చేయడానికి ప్రజా ప్రతినిధులు, అధికారులు సమన్వయంతో పనిచేయాలని సమావేశంలో అభిప్రాయాలు వ్యక్తమయ్యాయి.
