రాయలసీమ న్యూస్, వై.యస్.ఆర్: ప్రొద్దుటూరు నియోజకవర్గంలోని నంగనూరిపల్లె గ్రామంలో నిర్మించిన శ్రీ సీతారామస్వామి దేవాలయంలో మండల కార్యక్రమాలు పూర్తయిన సందర్భంగా గురువారం ప్రత్యేక పూజా కార్యక్రమాలు నిర్వహించారు. గ్రామ పెద్దల ఆహ్వానం మేరకు ఈ కార్యక్రమానికి పాతకోట బంగారు రెడ్డి హాజరయ్యారు.
దేవాలయం ప్రాంగణంలో నిర్వహించిన హోమంలో పాతకోట బంగారు రెడ్డి పాల్గొని స్వామివారిని దర్శించుకున్నారు. అనంతరం దేవాలయంలో ప్రత్యేక పూజలు నిర్వహించారు. గ్రామస్తులు, భక్తులు పెద్ద సంఖ్యలో హాజరై స్వామివారి దివ్యదర్శనం పొందారు.
ఈ కార్యక్రమంలో యువజన విభాగం అధ్యక్షులు ద్వార్శల గురునాథ్ రెడ్డి, నంగనూరిపల్లె గ్రామానికి చెందిన వైయస్ఆర్సీపీ నాయకులు, కార్యకర్తలు పాల్గొన్నారు. దేవాలయ నిర్మాణం పూర్తయి మండల కార్యక్రమాలు ముగిసిన సందర్భంగా గ్రామంలో పండుగ వాతావరణం నెలకొంది.
దేవాలయ కమిటీ సభ్యులు, గ్రామ పెద్దలు కలిసి హోమం, పూజా కార్యక్రమాల ఏర్పాట్లు చేశారు. ఉదయం నుంచే దేవాలయ ప్రాంగణంలో వేద మంత్రోచ్చారణల నడుమ హోమం నిర్వహించగా, అనంతరం మహా మంగళహారతి, ప్రసాద వితరణ కార్యక్రమాలు చేపట్టారు.
నూతనంగా నిర్మించిన శ్రీ సీతారామస్వామి దేవాలయం కారణంగా గ్రామానికి ఆధ్యాత్మిక వాతావరణం నెలకొన్నట్లు స్థానికులు అభిప్రాయపడ్డారు. గ్రామ ప్రజల సహకారంతో దేవాలయం నిర్మాణం పూర్తయిందని, భవిష్యత్తులో మరిన్ని ధార్మిక కార్యక్రమాలు నిర్వహించేందుకు కమిటీ ప్రణాళికలు సిద్ధం చేస్తున్నట్లు గ్రామస్థులు తెలిపారు.
