రాయలసీమ న్యూస్, వై.యస్.ఆర్: ప్రొద్దుటూరు పట్టణంలో నాయీ బ్రాహ్మణుల ఆత్మీయ సమావేశం జరిగింది. స్థానికంగా క్షవరం వ్యాపారం చేసుకొనే నాయీ బ్రాహ్మణులకు మద్దతు తెలుపుతూ, కార్పొరేట్ సంస్థల క్షవరం వ్యాపారాలను వ్యతిరేకించేందుకు ఈ సమావేశాన్ని ఏర్పాటు చేశారు. శేగిరెడ్డి కల్యాణమండపంలో జరిగిన ఈ కార్యక్రమానికి వై.యస్.ఆర్ కాంగ్రెస్ పార్టీ రాష్ట్ర అధికార ప్రతినిధి రాచమల్లు శివ ప్రసాద్ రెడ్డి అధ్యక్షత వహించారు.
కార్పొరేట్ సంస్థలు స్థానిక సెలూన్ వ్యాపారస్తులను ఏ విధంగా మోసం చేస్తున్నాయో, వారి వ్యాపారాలను ఎలా దెబ్బతీస్తున్నాయో నాయీ బ్రాహ్మణులకు రాచమల్లు శివ ప్రసాద్ రెడ్డి వివరించారు. స్థానికంగా కులవృత్తి ఆధారంగా క్షవరం వ్యాపారం చేసుకొనే వారికి తమ సంపూర్ణ మద్దతు ఉంటుందని ఆయన స్పష్టం చేశారు.
గతంలో మాజీ ముఖ్యమంత్రి వై.యస్ జగన్ మోహన్ రెడ్డి చేపట్టిన సంక్షేమ కార్యక్రమాలను ఈ సందర్భంగా రాచమల్లు శివ ప్రసాద్ రెడ్డి గుర్తుచేశారు. చెదోడు పథకం ద్వారా సుమారు పది వేల రూపాయలు అర్హులైన వారికి అందజేశారని ఆయన పేర్కొన్నారు. కులవృత్తి ఆధారంగా క్షవరం వ్యాపారం చేసుకొనే నాయీ బ్రాహ్మణులకు నెలకు 150 యూనిట్ల ఉచిత విద్యుత్ అందజేసిన ఘనత కూడా జగన్ మోహన్ రెడ్డి దేనని ఆయన తెలిపారు.
తిరుమల తిరుపతి దేవస్థానం పాలక మండలిలో సభ్యత్వం కల్పించడం ద్వారా నాయీ బ్రాహ్మణుల గౌరవాన్ని పెంచిన బాధ్యతను కూడా జగన్ మోహన్ రెడ్డి నిర్వర్తించారని రాచమల్లు శివ ప్రసాద్ రెడ్డి అన్నారు. రాష్ట్రంలోని ప్రతీ దేవాలయంలో పాలక మండలిలో నాయీ బ్రాహ్మణులకు అవకాశం కల్పించారని ఆయన వివరించారు.
ఉచిత ఇల్లు, ఫీజు రీయింబర్స్మెంట్, 25 లక్షల వరకు ఉచిత ఆరోగ్యశ్రీ కార్డులు వంటి సంక్షేమ పథకాల ద్వారా నాయీ బ్రాహ్మణులు సహా పేద కుటుంబాలకు జగన్ మోహన్ రెడ్డి ప్రభుత్వం మద్దతు అందించిందని రాచమల్లు శివ ప్రసాద్ రెడ్డి పేర్కొన్నారు.
తమను ప్రశ్నించిన నాయీ బ్రాహ్మణులను ఉద్దేశించి నాలుక కోస్తానని వ్యాఖ్యానించిన చంద్రబాబు ను భర్తరఫ్ చేయాలని ఆయన సమావేశంలో పిలుపునిచ్చారు. పెళ్లిళ్లు, చావులు సహా ప్రతి శుభ, అశుభ కార్యక్రమంలో స్థానిక నాయీ బ్రాహ్మణులు ప్రజలకు అండగా ఉంటారని, అలాంటి వారికే తమ పూర్తి మద్దతు ఉంటుందని రాచమల్లు శివ ప్రసాద్ రెడ్డి స్పష్టం చేశారు.
మోసం, దగా చేస్తున్న కార్పొరేట్ సంస్థలను ప్రొద్దుటూరు నుంచి పంపించే కార్యక్రమానికి స్థానిక నాయీ బ్రాహ్మణులు ఐక్యంగా ముందుకు రావాలని ఆయన కోరారు. స్థానిక వ్యాపారస్తుల హక్కుల పరిరక్షణ కోసం నాయీ బ్రాహ్మణులు సంఘటితంగా పోరాడాలని ఈ సమావేశం ద్వారా సందేశం ఇచ్చారు.
