రాయలసీమ న్యూస్, వై.యస్.ఆర్: కడప జిల్లా ప్రొద్దుటూరు లోని శ్రీ విద్యా జూనియర్ కాలేజీలో అవయవదానంపై అవగాహన సదస్సు నిర్వహించారు. ప్రతి ఒక్కరూ అవయవాలు దానం చేయడం ద్వారా మరణించిన తర్వాత కూడా ఇతరుల జీవితాల్లో వెలుగులు నింపవచ్చని వక్తలు పేర్కొన్నారు. సమాజాన్ని బ్రతికించడం, ఆపదలో ఉన్నవారికి ప్రాణం పోయడం ప్రతి పౌరుడి సామాజిక బాధ్యతగా భావించాలని ఈ సందర్భంగా పిలుపునిచ్చారు.
అఖిల భారత అవయవ దాతల సంఘం, సావిత్రి బాయి పూలే ఎడ్యుకేషనల్ అండ్ చారిటబుల్ ట్రస్ట్ చైర్ పర్సన్ గోడూరు సీతా మహాలక్ష్మి ఆదేశాల మేరకు ప్రెసిడెంట్ లీగల్ అడ్వైజర్, న్యాయవాది డాక్టర్ జె.ప్రభాకర్, వైస్ ప్రెసిడెంట్ డి.వసుధ భార్గవి, సెక్రటరీ యం.బాలాజీ, ప్రొద్దుటూరు రూరల్ సర్కిల్ ఇన్స్పెక్టర్ నాగభూషణం, మమత నర్సింగ్ హోమ్ ప్రొద్దుటూరు డాక్టర్ డి.నరసింహ రెడ్డి, శ్రీ విద్యా జూనియర్ కాలేజ్ డైరెక్టర్ యం.రామ మోహన్, కరస్పాండెంట్ యస్.శ్రీకాంత్ రెడ్డి తదితరులు ఈ కార్యక్రమానికి పిలుపునిచ్చారు.
సదస్సులో విద్యార్థులు అవయవాలు దానం చేయడంలో ముందుండేందుకు సిద్ధంగా ఉన్నట్లు తెలియజేశారు. రోడ్డు ప్రమాదాల్లో ప్రాణాలు కోల్పోయిన వారి అవయవాలను దానం చేయడం ద్వారా ప్రాణాపాయ స్థితిలో ఉన్నవారికి పునర్జీవం కల్పించవచ్చని వక్తలు వివరించారు. ఈ విధంగా వారి కుటుంబాలకు వెన్నుదన్నుగా నిలవచ్చని పేర్కొన్నారు.
అవయవాలను అత్యవసర సమయాల్లో వేగంగా తరలించడానికి ప్రభుత్వం పోలీసు వ్యవస్థను గ్రీన్ ఛానెల్ ద్వారా వినియోగిస్తున్నట్లు సదస్సులో తెలియజేశారు. ఈ విధానం ద్వారా అవయవాలను సమయానికి అవసరమైన రోగులకు చేరవేసి ప్రాణాలను కాపాడే అవకాశం పెరుగుతోందని చెప్పారు.
రక్తదానం ప్రాముఖ్యతను కూడా వక్తలు విద్యార్థులకు వివరించారు. ప్రతి ఒక్కరూ స్వచ్ఛందంగా రక్తదానం చేసి ప్రాణదాతలుగా మారాలని సూచించారు. బ్రెయిన్ డెడ్ అయినప్పుడు అవయవాలను దానం చేయడం ద్వారా ఇతరుల జీవితాల్లో వెలుగులు నింపవచ్చని, మరణానంతరం నేత్రాలను దానం చేసి అంధుల జీవితాల్లో చూపును ప్రసాదించవచ్చని తెలిపారు.
మృతదేహాన్ని వైద్య విద్యార్థుల పరిశోధనలకు, అధ్యయనానికి అందించడం ద్వారా వైద్య రంగానికి సేవ చేయవచ్చని వక్తలు వివరించారు. విద్యాదానం ద్వారా భావితరాల విద్యార్థుల భవిష్యత్తుకు బలమైన పునాదులు వేయవచ్చని సూచించారు.
‘మరణించినా… జీవించండి!’ అనే సందేశంతో విద్యార్థులలో చైతన్యం రగిలించేందుకు ఈ కార్యక్రమం ఉపయోగపడిందని నిర్వాహకులు పేర్కొన్నారు. ముగింపులో విద్యార్థులు పెద్ద సంఖ్యలో స్వచ్ఛందంగా ముందుకు వచ్చి, భవిష్యత్తులో తామూ అవయవదానం చేస్తామని ప్రతిజ్ఞ చేసి తమ సామాజిక బాధ్యతను చాటుకున్నారు.
