రాయలసీమ న్యూస్, వై.యస్.ఆర్: ఆంధ్రప్రదేశ్ ఉప ముఖ్యమంత్రి, జనసేన పార్టీ అధినేత పవన్ కళ్యాణ్‌పై, బలిజ సామాజిక వర్గంపై ప్రొద్దుటూరు మాజీ ఎమ్మెల్యే రాచమల్లు శివప్రసాద్ రెడ్డి చేసిన వ్యాఖ్యలు కడప జిల్లాలో తీవ్ర ప్రతిచర్యలకు దారితీశాయి. రాచమల్లు అనుచిత వ్యాఖ్యలను కడప జిల్లా బలిజ సంఘం, జనసేన నాయకులు తీవ్రంగా ఖండించారు.
వైకాపా నాయకులు రాజకీయ ప్రయోజనాల కోసం కుల విద్వేషాలను రెచ్చగొట్టే ప్రయత్నం చేస్తున్నారని జనసేన నేత అల్లం చంద్రశేఖర్ రాయల్ ఆరోపించారు. గతంలో వైకాపా సాధించిన విజయాలు బెదిరింపులు, బలవంతపు ఏకగ్రీవాలతోనే సాధ్యమయ్యాయని ఆయన వ్యాఖ్యానించారు. 2024 ఎన్నికల్లో తాళ్లమాపురం ప్రజలు కూటమి అభ్యర్థికి 300 ఓట్ల మెజారిటీ ఇచ్చి రాచమల్లుకు గట్టి హెచ్చరిక ఇచ్చినట్టేనని ఆయన స్పష్టం చేశారు.
పవన్ కళ్యాణ్ ఎల్లప్పుడూ మౌలిక వసతులు, ప్రజా సంక్షేమం గురించి మాత్రమే మాట్లాడే నాయకుడని, కుల రాజకీయాలకు ఆయన దూరంగా ఉంటారని చంద్రశేఖర్ రాయల్ పేర్కొన్నారు. వ్యక్తిగత, కుల స్థాయిలో దూషణలకు పాల్పడటం వైకాపా నాయకుల అలవాటుగా మారిందని ఆయన విమర్శించారు.
గత కాంగ్రెస్, వైకాపా ప్రభుత్వాల హయాంలో తాళ్లమాపురం గ్రామానికి కనీస రహదారులు, తాగునీరు, డ్రైనేజీ వంటి మౌలిక వసతులు కూడా అందించడంలో ఆ ప్రభుత్వాలు విఫలమయ్యాయని చంద్రశేఖర్ రాయల్ ఆరోపించారు. కూటమి ప్రభుత్వం అధికారంలోకి వచ్చిన వెంటనే గ్రామంలో రహదారులు, తాగునీటి పనులు శరవేగంగా జరుగుతున్నాయని ఆయన తెలిపారు.
గ్రామంలో జరుగుతున్న అభివృద్ధిని చూసి ఓర్వలేక రాచమల్లు అసహనంతో మాట్లాడుతున్నారని జనసేన నేతలు విమర్శించారు. సమాజాన్ని కించపరిచేలా మాట్లాడే తీరును వెంటనే మానుకోవాలని, చేసిన వ్యాఖ్యలను బేషరతుగా ఉపసంహరించుకోవాలని వారు డిమాండ్ చేశారు.
రాచమల్లు తన వ్యాఖ్యలను వెనక్కి తీసుకోకపోతే ప్రజలే తగిన రీతిలో బుద్ధి చెబుతారని అల్లం చంద్రశేఖర్ రాయల్ హెచ్చరించారు. బలిజ సామాజిక వర్గాన్ని లక్ష్యంగా చేసుకుని చేసే దూషణలను ఇక సహించబోమని కడప జిల్లా బలిజ సంఘం నేతలు స్పష్టం చేశారు.
