రాయలసీమ న్యూస్, వై.యస్.ఆర్: ప్రొద్దుటూరు పట్టణాన్ని ప్లాస్టిక్ రహితంగా మార్చేందుకు ప్రజలు, చిరు వ్యాపారులు చూపుతున్న స్పందనకు ప్రొద్దుటూరు పురపాలక సంఘం కమిషనర్ తూతిక శ్రీనివాస విశ్వనాధ్ కృతజ్ఞతలు తెలిపారు. పట్టణ అభివృద్ధి, ప్రజల ఆరోగ్య రక్షణ కోసం ప్లాస్టిక్ వినియోగాన్ని స్వచ్ఛందంగా తగ్గించాలని ఆయన విజ్ఞప్తి చేశారు.
ప్రొద్దుటూరు ప్రజల శ్రేయస్సు కోరుకునే ప్రతి ఒక్కరు, పట్టణంలో పెరుగుతున్న పిల్లల ఆరోగ్యం బాగుండాలని భావించే వారందరూ ప్లాస్టిక్ వాడకాన్ని మానుకోవాలని కమిషనర్ పిలుపునిచ్చారు. ప్లాస్టిక్ వల్ల పర్యావరణానికి, ప్రజల ఆరోగ్యానికి కలిగే హానిని దృష్టిలో పెట్టుకుని ఈ నిర్ణయం తీసుకోవాల్సిన అవసరం ఉందని పురపాలక సంఘం అధికారులు పేర్కొంటున్నారు.
ప్రొద్దుటూరు ప్రజలకు కృతజ్ఞతలు.. ప్లాస్టిక్ రహిత ప్రొద్దుటూరుకు సంపూర్ణ సహకారం అందిస్తున్న చిరు వ్యాపారులకు కృతజ్ఞతలు. ప్రొద్దుటూరు ప్రజల శ్రేయస్సు కోరుకునే ప్రతి ఒక్కరు.. మన ప్రొద్దుటూరు బిడ్డల ఆరోగ్యం బాగుండాలి అని భావించే ప్రతి ఒక్కరు ప్లాస్టిక్ వాడకాన్ని స్వచ్చందంగా విరమించాలని మీ శ్రేయోభిలాషిగా ప్రార్ధిస్తున్నాను. రండి.. ప్లాస్టిక్ లేని ప్రొద్దుటూరుని ఆవిష్కరిద్దాం.. ప్రొద్దుటూరు నవనిర్మాణానికి శ్రీకారం చుడదాం.. భవదీయులు, తూతిక శ్రీనివాస విశ్వనాధ్.. కమీషనర్, ప్రొద్దుటూరు, పురపాలక సంఘం,
పట్టణంలో ప్లాస్టిక్ వినియోగాన్ని తగ్గించేందుకు పురపాలక సంఘం ఇప్పటికే అవగాహన కార్యక్రమాలు ప్రారంభించింది. మార్కెట్లు, వాణిజ్య కేంద్రాలు, విద్యాసంస్థలు, నివాస ప్రాంతాల్లో ప్లాస్టిక్ ప్రభావం గురించి ప్రజలకు వివరించి, ప్రత్యామ్నాయ వినియోగంపై సూచనలు అందిస్తోంది. ముఖ్యంగా చిరు వ్యాపారులు ప్లాస్టిక్ సంచుల వినియోగాన్ని తగ్గిస్తూ, ఇతర మార్గాలను అనుసరించడం ప్రారంభించినట్లు అధికారులు చెబుతున్నారు.
ప్లాస్టిక్ రహిత ప్రొద్దుటూరు లక్ష్యంగా పురపాలక సంఘం ప్రత్యేక కార్యాచరణ ప్రణాళికను సిద్ధం చేస్తోంది. ప్రజల సహకారం, వ్యాపారుల భాగస్వామ్యంతో ఈ లక్ష్యాన్ని సాధించగలమనే నమ్మకం అధికారుల్లో కనిపిస్తోంది. పట్టణ అభివృద్ధి, శుభ్రత, ఆరోగ్య పరిరక్షణలో ఇది కీలకమైన అడుగుగా భావిస్తున్నారు.
ప్రొద్దుటూరు నవనిర్మాణం, పర్యావరణ పరిరక్షణకు ప్రజలంతా ముందుకు రావాలని, ప్లాస్టిక్ వినియోగాన్ని తగ్గించే ఉద్యమాన్ని సామూహికంగా విజయవంతం చేయాలని పురపాలక సంఘం విజ్ఞప్తి చేస్తోంది.
