రాయలసీమ న్యూస్, వై.యస్.ఆర్: ప్రొద్దటూరు:- ప్లాస్టిక్ వినియోగాన్ని తగ్గించి ప్రొద్దుటూరు పట్టణాన్ని ప్లాస్టిక్ రహిత నగరంగా తీర్చిదిద్దే లక్ష్యంతో స్వచ్ఛ సంకల్ప దీక్ష అడ్వైజరీ కమిటీ శనివారం క్షేత్రస్థాయిలో పర్యటించింది. కమిటీ సభ్యులు పట్టణంలోని పలు దుకాణాలను సందర్శించి ప్లాస్టిక్ వినియోగం, నిల్వ, విక్రయాలపై పరిశీలన నిర్వహించారు.
ఈ సందర్భంగా వ్యాపారులకు ప్లాస్టిక్ వల్ల కలిగే పర్యావరణ, ప్రజారోగ్య సమస్యలను కమిటీ సభ్యులు వివరించారు. ప్లాస్టిక్ వినియోగాన్ని తగ్గించే దిశగా ప్రత్యామ్నాయ వస్తువుల వినియోగాన్ని ప్రోత్సహించాలని సూచించారు. దుకాణాల్లో వినియోగంలో ఉన్న ప్లాస్టిక్ కవర్లు, ఇతర ప్లాస్టిక్ వ్యర్థాలను సేకరించి వాటిని సరైన విధంగా నిర్వహించాల్సిన అవసరాన్ని వ్యాపారులకు తెలియజేశారు.
ప్లాస్టిక్ వ్యర్థాలను రోడ్లపై, కాలువల్లో, బహిరంగ ప్రదేశాల్లో వేయకుండా మున్సిపల్ సిబ్బందికి అందించాలని కమిటీ సభ్యులు సూచించారు. ఒక్కరోజు కార్యక్రమంగా కాకుండా నిరంతర అవగాహన కార్యక్రమాల ద్వారా మాత్రమే పట్టణంలో ప్లాస్టిక్ వినియోగాన్ని గణనీయంగా తగ్గించవచ్చని వారు అభిప్రాయపడ్డారు.
ఈ కార్యక్రమంలో Rotary Club చైర్మన్ కొవ్వూరు రమేష్ రెడ్డి, AP NGO తాలుకా అధ్యక్షుడు రామ సుబ్బయ్య యాదవ్, Indian Medical Association ప్రతినిధి, సామాజిక సేవకులు, Traffic CI భాస్కర్ తదితరులు పాల్గొన్నారు. వీరు వ్యాపారులకు ప్లాస్టిక్ వినియోగం వల్ల డ్రైనేజీ వ్యవస్థలు దెబ్బతినడం, పర్యావరణ కాలుష్యం పెరగడం, ప్రజల ఆరోగ్యంపై ప్రతికూల ప్రభావాలు పడే అవకాశం ఉందని వివరించారు.
పట్టణంలో ప్లాస్టిక్ రహిత వాతావరణాన్ని నెలకొల్పేందుకు వ్యాపారులు, ప్రజలు, స్వచ్ఛంద సంస్థలు, మున్సిపల్ అధికారులు సమన్వయంతో పనిచేయాల్సిన అవసరాన్ని కమిటీ సభ్యులు ఉద్ఘాటించారు. ముఖ్యంగా వ్యాపారులు వినియోగదారులకు ప్లాస్టిక్ కవర్లకు బదులుగా పర్యావరణహిత ప్రత్యామ్నాయాలను అందించాలని కోరారు.
ప్లాస్టిక్ రహిత ప్రొద్దుటూరు లక్ష్యంగా అడ్వైజరీ కమిటీ సభ్యులు ఇకపై ప్రతి మూడవ శనివారం క్షేత్రస్థాయి పర్యటన నిర్వహించేందుకు సిద్ధంగా ఉన్నారని మున్సిపల్ కమిషనర్ తూతిక శ్రీనివాస విశ్వనాథ్ తెలిపారు. పట్టణంలోని వివిధ ప్రాంతాల్లో పరిస్థితిని పరిశీలిస్తూ వ్యాపారులు, ప్రజలకు నిరంతరం అవగాహన కల్పించే కార్యక్రమాలు కొనసాగిస్తామని ఆయన చెప్పారు.
ప్లాస్టిక్ నియంత్రణలో ప్రజల భాగస్వామ్యం అత్యంత కీలకమని, ప్రతి ఒక్కరూ బాధ్యతగా వ్యవహరిస్తే ప్రొద్దుటూరును మరింత పరిశుభ్రమైన, పర్యావరణహిత పట్టణంగా తీర్చిదిద్దవచ్చని మున్సిపల్ కమిషనర్ పేర్కొన్నారు.
