రాయలసీమ న్యూస్, వై.యస్.ఆర్: ప్రొద్దుటూరు: పండుగల సీజన్లలో ప్రైవేట్ బస్సు యాజమాన్యాలు ప్రయాణికుల నుంచి భారీగా వసూలు చేస్తున్న అదనపు ఛార్జీలను అరికట్టాలని డిమాండ్ చేస్తూ సీఐటీయూ ఆధ్వర్యంలో బుధవారం స్థానిక ఆర్టీఓ కార్యాలయం ఎదుట నిరసన ధర్నా నిర్వహించారు. ఆర్టీఓ అధికారుల నిర్లక్ష్య వైఖరిని వ్యతిరేకిస్తూ ఈ కార్యక్రమాన్ని చేపట్టారు.
ఈ సందర్భంగా సీఐటీయూ జిల్లా కార్యదర్శి సత్యనారాయణ, మున్సిపల్ యూనియన్ కార్యదర్శి సాల్మన్ మాట్లాడుతూ పండుగల సమయంలో ప్రైవేట్ బస్సుల అదనపు ఛార్జీల వల్ల సామాన్య ప్రజలు తీవ్ర ఇబ్బందులు పడుతున్నారని ఆవేదన వ్యక్తం చేశారు.
వారు తెలిపారు హైదరాబాద్, చెన్నై, విజయవాడ తదితర ప్రాంతాల్లో ఉద్యోగాలు, వ్యాపారాలు చేస్తూ జీవనం సాగిస్తున్న పేద, మధ్యతరగతి ప్రజలు పండుగ సమయాల్లో తమ సొంత గ్రామాలకు వచ్చి కుటుంబ సభ్యులతో గడపాలని ఎంతో ఆశగా ఎదురుచూస్తారని. అయితే ప్రైవేట్ బస్సు యాజమాన్యాలు పండుగ సీజన్లను ఆసరాగా చేసుకుని ఆన్లైన్ ద్వారా విపరీతంగా ఛార్జీలు పెంచి దోపిడీకి పాల్పడుతున్నారని వారు విమర్శించారు.
దీనివల్ల సామాన్య ప్రజలు తమ సొంత ఊర్లకు వెళ్లలేని దారుణ పరిస్థితి ఏర్పడుతోందని నాయకులు పేర్కొన్నారు. ప్రైవేట్ ఆపరేటర్లు బహిరంగంగానే దోపిడీకి పాల్పడుతున్నా, సంబంధిత ఆర్టీఓ అధికారులు ఎందుకు చర్యలు తీసుకోవడం లేదని ప్రశ్నించారు. అధికారులు ప్రైవేట్ ఆపరేటర్లకు అనుకూలంగా వ్యవహరిస్తూ, ఈ అక్రమ వసూళ్లను పట్టించుకోవడం లేదనే ఆరోపణలు వినిపిస్తున్నాయని వారు అన్నారు.
రాబోయే వినాయక చవితి పండుగను దృష్టిలో పెట్టుకుని ప్రైవేట్ బస్సుల యాజమాన్యాలు మరోసారి ఛార్జీలు పెంచడానికి సిద్ధమవుతున్నాయని, కాబట్టి అధికారులు ఇప్పటికైనా ముందస్తు చర్యలు చేపట్టాలని డిమాండ్ చేశారు. ప్రైవేట్ బస్సులపై ప్రభుత్వం నిర్ణయించిన నిబంధనలను కచ్చితంగా అమలు చేయాలని, నిబంధనలు ఉల్లంఘించే యాజమాన్యాలపై కఠిన చర్యలు తీసుకోవాలని కోరారు.
ఈ ధర్నా కార్యక్రమంలో మున్సిపల్ యూనియన్ అధ్యక్షుడు ఎం.చంటి, కమిటీ సభ్యులు శాంతి, సీతమ్మ, కార్తీక్, చిన్న సామయ్య, ఐద్వా కార్యదర్శి జె.ప్రేమ, ఉపాధ్యక్షురాలు వై.విజయమ్మ, యు.వెంకటసుబ్బమ్మ, ఎం.లక్ష్మీదేవి, డీవైఎఫ్ఐ కార్యదర్శి బి.విశ్వనాథ్, అధ్యక్షుడు మేరీ బాబు తదితరులు పాల్గొన్నారు.
