రాయలసీమ న్యూస్, వై.యస్.ఆర్: ప్రొద్దుటూరు: ప్రొద్దుటూరు పట్టణంలో పారిశుధ్యం లోపం సహా వివిధ ప్రజా సమస్యలపై మున్సిపల్ కమిషనర్ విశ్వనాథ్కు ప్రజలు ఫిర్యాదులు సమర్పించారు. పట్టణానికి ఇటీవల బాధ్యతలు స్వీకరించిన కొత్త కమిషనర్ సోమవారం ప్రజల సమస్యలను నేరుగా తెలుసుకోవడానికి ‘ఫోన్ ద్వారా ముఖాముఖి’ కార్యక్రమాన్ని నిర్వహించారు.
ఈ కార్యక్రమం ద్వారా మొత్తం 25 మంది ప్రజలు తమ తమ ప్రాంతాల్లో ఎదుర్కొంటున్న సమస్యలను కమిషనర్కు నేరుగా తెలియజేశారు. పారిశుధ్యం లోపం, దోమల నివారణ చర్యల లోపం, వీధి కుక్కలు, పందుల సంచారం, రోడ్ల దుస్థితి, డ్రైనేజీ వ్యవస్థ లోపాలు, ఫుట్పాత్ ఆక్రమణలు వంటి అంశాలపై ఎక్కువ ఫిర్యాదులు వచ్చినట్లు మున్సిపల్ అధికారులు తెలిపారు.
ఫిర్యాదుదారుల పేర్లు, మొబైల్ నంబర్లు, వారి సమస్యల వివరాలను నమోదు చేసి, త్వరితగతిన పరిష్కరించేందుకు సంబంధిత విభాగాధికారులకు పంపించారు. పారిశుధ్యం, ఇంజనీరింగ్, టౌన్ ప్లానింగ్ వంటి విభాగాలకు సమస్యల వారీగా ఫిర్యాదులను బదిలీ చేసి, వాటి పరిష్కారంపై నిరంతర పర్యవేక్షణ చేయాలని కమిషనర్ ఆదేశించినట్లు సమాచారం.
పట్టణంలోని అనేక ప్రాంతాల్లో చెత్త సేకరణ సక్రమంగా జరగకపోవడం, వీధులు సమయానికి ఊడ్చకపోవడం వల్ల పారిశుధ్య సమస్యలు తీవ్రరూపం దాల్చాయని ప్రజలు ఫిర్యాదు చేశారు. దోమల బెడద పెరిగినా ఫాగింగ్ కార్యక్రమాలు సక్రమంగా నిర్వహించకపోవడంతో ప్రజలు అనారోగ్య సమస్యలను ఎదుర్కొంటున్నారని పేర్కొన్నారు.
వీధి కుక్కల సంఖ్య అధికమై పిల్లలు, పెద్దలపై దాడులు చేసే ఘటనలు పెరుగుతున్నాయని, నివాస ప్రాంతాల్లో పందుల సంచారం వల్ల తీవ్ర అపరిశుభ్రత నెలకొంటోందని బాధితులు తెలిపారు. అంతర్గత రహదారులు గుంతలమయంగా మారి వాహనదారులు, పాదచారులు ఇబ్బందులు పడుతున్నారని, మురుగు కాలువలు పూడిక తీయకపోవడంతో మురుగు నీరు రోడ్లపైకి చేరి రాకపోకలకు ఆటంకం కలుగుతోందని ఫిర్యాదుల్లో పేర్కొన్నారు.
ఫుట్పాత్లను వ్యాపారస్తులు ఆక్రమించడంతో పాదచారులు రోడ్లపై నడవాల్సి వస్తోందని, దీనివల్ల ప్రమాదాలు సంభవించే అవకాశం ఉందని ప్రజలు ఆందోళన వ్యక్తం చేశారు. ప్రజలు కార్యాలయానికి రావాల్సిన అవసరం లేకుండా నేరుగా ఫోన్ ద్వారా సమస్యలను స్వీకరించే విధానాన్ని కొత్త కమిషనర్ అమలు చేయడం స్థానికంగా చర్చనీయాంశంగా మారింది.
‘ఫోన్ ద్వారా ముఖాముఖి’ కార్యక్రమం ద్వారా అందిన ఫిర్యాదులను విభాగాల వారీగా వర్గీకరించి, త్వరితగతిన పరిష్కరించేందుకు చర్యలు కొనసాగుతున్నట్లు మున్సిపల్ వర్గాలు వెల్లడించాయి. పట్టణ ప్రజల నుంచి వచ్చే ఫిర్యాదులను నిరంతరంగా స్వీకరించి, సమస్యల పరిష్కారంపై దృష్టి సారించనున్నట్లు అధికారులు పేర్కొన్నారు.
