రాయలసీమ న్యూస్, వై.యస్.ఆర్: ప్రొద్దుటూరు: ప్రజలకు మెరుగైన పౌర సేవలు అందించడంతో పాటు, వారి సమస్యలను సత్వరంగా పరిష్కరించి ప్రజల్లో సానుకూల అభిప్రాయాన్ని పెంపొందించేలా పనిచేయాలని ప్రొద్దుటూరు మున్సిపల్ కమిషనర్ తూతిక శ్రీనివాస విశ్వనాథ్ సూచించారు. ప్రొద్దుటూరు పురపాలక సంఘ పరిధిలోని వార్డు సచివాలయాల్లో నిర్వహిస్తున్న ఫిర్యాదు రిజిస్టర్లపై వార్డు అడ్మినిస్ట్రేటివ్ సెక్రటరీలతో కమిషనర్ సమీక్ష సమావేశం నిర్వహించారు.
ఈ సందర్భంగా సచివాలయ పరిధిలో ప్రజల నుంచి అందే ప్రతి ఫిర్యాదును తప్పనిసరిగా రిజిస్టర్లో నమోదు చేయాలని కమిషనర్ అధికారులకు ఆదేశించారు. ఫిర్యాదులు నమోదు చేసిన తర్వాత సంబంధిత విభాగాల అధికారులతో సమన్వయం చేసుకుని వీలైనంత త్వరగా పరిష్కరించేలా చర్యలు తీసుకోవాలని సూచించారు.
ఫిర్యాదుల పరిష్కారంలో ఎలాంటి జాప్యం లేకుండా చూడాలని, ఇప్పటికే పరిష్కరించిన ఫిర్యాదుల వివరాలను కూడా రిజిస్టర్లో స్పష్టంగా నమోదు చేయాలని కమిషనర్ పేర్కొన్నారు. పెండింగ్లో ఉన్న ఫిర్యాదులపై ప్రత్యేక దృష్టి సారించి, వాటి పరిష్కారానికి ప్రాధాన్యత క్రమంలో చర్యలు తీసుకోవాలని వార్డు అడ్మినిస్ట్రేటివ్ సెక్రటరీలకు సూచించారు.
ప్రజలకు అందిస్తున్న సేవలపై వారి అభిప్రాయాలు IVRS ద్వారా నమోదు అవుతున్న నేపథ్యంలో, ప్రతి సచివాలయ సిబ్బంది ప్రజల సమస్యలను బాధ్యతగా స్వీకరించాలని కమిషనర్ అన్నారు. సత్వర పరిష్కారం అందించడం ద్వారా IVRSలో Public Positive Perception పెరిగేలా పనిచేయాలని ఆయన సూచించారు.
సచివాలయాలకు వచ్చే ప్రతి ఒక్కరితో మర్యాదపూర్వకంగా, ఓపికగా, బాధ్యతాయుతంగా వ్యవహరించాలని కమిషనర్ అధికారులకు సూచించారు. ప్రజల సమస్యలను సానుభూతితో విని, పరిష్కారం దిశగా చొరవ చూపాలని ఆయన పేర్కొన్నారు. ప్రజలకు మంచి సేవలు అందించడం ద్వారా మున్సిపల్ పరిపాలనపై ప్రజల్లో విశ్వాసం, సానుకూల అభిప్రాయం మరింత పెరిగేలా ప్రతి ఉద్యోగి కృషి చేయాలని కమిషనర్ స్పష్టం చేశారు.
ప్రజా సమస్యల పరిష్కారం, సత్వర స్పందన, మర్యాదపూర్వక సేవలు, IVRSలో సానుకూల అభిప్రాయం పెంపు అనే లక్ష్యంతో అధికారులు, సిబ్బంది సమన్వయంతో పనిచేయాలని కమిషనర్ సూచించారు. ఈ దిశగా ప్రతి వార్డు సచివాలయంలో ఫిర్యాదు రిజిస్టర్ల నిర్వహణను మరింత పటిష్టం చేయాలని, ప్రజలకు అందించే సేవల ప్రమాణాన్ని పెంచాలని ఆయన సూచించారు.
