రాయలసీమ న్యూస్, వై.యస్.ఆర్:
ప్రొద్దుటూరు కో-ఆపరేటివ్ టౌన్ బ్యాంక్కు ₹1.69 కోట్ల లాభం
ప్రొద్దుటూరు: ప్రొద్దుటూరు కో-ఆపరేటివ్ టౌన్ బ్యాంక్ లిమిటెడ్ 105వ వార్షిక మహాజన సభను గురువారం బ్యాంక్ ప్రాంగణంలో ఘనంగా నిర్వహించారు. బ్యాంక్ చైర్మన్ బొగ్గుల వెంకట సుబ్బారెడ్డి అధ్యక్షతన జరిగిన ఈ సమావేశంలో 2025–26 ఆర్థిక సంవత్సరానికి సంబంధించిన బ్యాంక్ ఆర్థిక ఫలితాలు, అభివృద్ధి కార్యక్రమాలను వివరించారు.
ఈ ఆర్థిక సంవత్సరంలో బ్యాంక్ ₹1.69 కోట్ల నికర లాభాన్ని ఆర్జించినట్లు చైర్మన్ సభకు తెలియజేశారు. బ్యాంక్ కార్యకలాపాల విస్తరణ, సభ్యులు–ఖాతాదారులకు అందిస్తున్న సేవల బలోపేతం వల్లే ఈ ఆర్థిక ఫలితాలు సాధ్యమయ్యాయని నిర్వాహకులు పేర్కొన్నారు.
సభలో పాల్గొన్న సభ్యులకు 2025–26 ఆర్థిక సంవత్సరానికి గానూ 10 శాతం డివిడెండ్ చెల్లించేందుకు మహాజన సభ ఏకగ్రీవంగా ఆమోదం తెలిపింది. సభ్యుల ప్రయోజనాలను దృష్టిలో ఉంచుకుని బ్యాంక్ సేవలను మరింత విస్తరించేందుకు అవసరమైన చర్యలు తీసుకుంటున్నట్లు నిర్వాహకులు ఈ సందర్భంగా వెల్లడించారు.
ఖాతాదారులు, సభ్యులకు మరింత మెరుగైన, ఆధునిక బ్యాంకింగ్ సేవలు అందించేందుకు సరికొత్త సాంకేతికతను వినియోగించనున్నట్లు బ్యాంక్ పాలకవర్గం తెలిపింది. బ్యాంక్ పురోగతికి సహకరించిన ఖాతాదారులు, పాలకవర్గం, అధికారులు మరియు సిబ్బందికి ధన్యవాదాలు తెలిపారు. భవిష్యత్తులో సంస్థను మరింత ఉన్నత స్థానానికి తీసుకెళ్లేందుకు ఉమ్మడిగా కృషి కొనసాగిస్తామని స్పష్టం చేశారు.
మహాజన సభలో బ్యాంక్ వైస్ చైర్మన్ జి. మహమ్మద్ గౌస్, డైరెక్టర్లు నందం సీతారామయ్య, కె. కిషోర్ కుమార్, పి. సురేష్, వి. రాంభూపాల్ రెడ్డి, జి. గంగాధర్, వై. కుమార్ రెడ్డి, కె. ఖలీల్, పి. సురేంద్రనాథ్ రెడ్డి, వి. విజయ భాస్కర్ రెడ్డి, ఎల్.వి. రమణ రెడ్డి, బి. ఓబుల రెడ్డి, చార్టర్డ్ అకౌంటెంట్ కె. నాగేంద్రకుమార్, కె. సూర్యనారాయణ రెడ్డి తదితరులు పాల్గొన్నారు.
