రాయలసీమ న్యూస్, వై.యస్.ఆర్: కడప జిల్లా స్థాయి అథ్లెటిక్స్ పోటీలు ఈ నెల 20న ఆదివారం ప్రొద్దుటూరులో జరగనున్నాయి. భాషా అథ్లెటిక్స్ ఫౌండేషన్ ఆధ్వర్యంలో నిర్వహించే ఈ పోటీల్లో అండర్-18, అండర్-20 వయో విభాగాలకు చెందిన స్త్రీ, పురుష క్రీడాకారులు పాల్గొననున్నారు. ఈ విషయాన్ని ఫౌండేషన్ కార్యదర్శి వై. అన్వర్ భాషా, జిల్లా అథ్లెటిక్స్ అసోసియేషన్ అధ్యక్షుడు బసిరెడ్డి వీర కల్యాణ్ రెడ్డి వెల్లడించారు.
ప్రొద్దుటూరులోని అనిబిసెంట్ మున్సిపల్ హైస్కూల్ క్రీడా మైదానంలో ఉదయం 9 గంటలకు పోటీలు ప్రారంభమవుతాయి. అండర్-18 విభాగంలో 28-10-2008 నుంచి 27-10-2010 మధ్య జన్మించిన క్రీడాకారులు, అండర్-20 విభాగంలో 28-10-2006 నుంచి 27-10-2008 మధ్య జన్మించిన క్రీడాకారులు పాల్గొనే అర్హత కలిగి ఉంటారు.
ఈ పోటీల్లో 100 మీటర్లు, 200 మీటర్లు, 400 మీటర్లు, 1000 మీటర్ల పరుగు పందేలతో పాటు లాంగ్జంప్, హైజంప్, షాట్పుట్, డిస్కస్ త్రో, జావెలిన్ త్రో వంటి విభాగాలు నిర్వహించనున్నారు. ప్రతి విభాగంలో స్త్రీ, పురుషుల కోసం వేర్వేరు పోటీలు ఉంటాయని నిర్వాహకులు తెలిపారు.
ఈ జిల్లా స్థాయి పోటీల్లో ప్రతిభ కనబరిచిన క్రీడాకారులను అక్టోబర్ 2, 3, 4 తేదీల్లో ఒంగోలులో జరగనున్న స్టేట్ జూనియర్ అథ్లెటిక్స్ ఛాంపియన్షిప్కు ఎంపిక చేయనున్నారు. రాష్ట్ర స్థాయి పోటీల్లో జిల్లా తరఫున ప్రాతినిధ్యం వహించే క్రీడాకారుల ఎంపికకు ఈ పోటీలు ప్రమాణంగా పరిగణించబడతాయని నిర్వాహకులు పేర్కొన్నారు.
పోటీల్లో పాల్గొనే క్రీడాకారుల వయస్సు కనీసం 16 సంవత్సరాలు నిండి ఉండాలని స్పష్టం చేశారు. వయస్సు ధృవీకరణ కోసం ఆధార్ కార్డ్ లేదా జనన ధృవీకరణ పత్రం తప్పనిసరిగా తీసుకురావాలని సూచించారు. విజేతలకు ప్రశంసా పత్రాలు అందజేయనున్నట్లు తెలిపారు.
పోటీలకు హాజరయ్యే క్రీడాకారులు ముందస్తుగా తమ పేర్లు నమోదు చేసుకోవాలని, మరిన్ని వివరాల కోసం 99496 86586, 80198 80995 నంబర్లలో సంప్రదించవచ్చని నిర్వాహకులు తెలిపారు. జిల్లా వ్యాప్తంగా ఉన్న యువ అథ్లెట్లంతా ఈ అవకాశాన్ని వినియోగించుకోవాలని వారు కోరారు.
