రాయలసీమ న్యూస్, వై.యస్.ఆర్: ప్రొద్దుటూరు పట్టణంలో గణేష్ ఉత్సవాల సందర్భంగా పేరుకు తగ్గట్టుగానే వ్యాపార రద్దీ పెరిగి, నగరం అంతా చెత్తతో నిండిపోయింది. ఈ పరిస్థితుల్లో గత 48 గంటలుగా పారిశుధ్య కార్మికులు నిరంతరం శ్రమిస్తూ పట్టణాన్ని శుభ్రం చేయడానికి కృషి చేస్తున్నారు. గణేష్ పండగ రోజున కూడా ఇంటికెళ్లకుండా విధుల్లో నిమగ్నమై ఉన్నారు.

ప్రొద్దుటూరు వ్యాపార కేంద్రంగా ఉండటంతో గణేష్ ఉత్సవాల సమయంలో ఇతర ప్రాంతాల నుంచి పెద్ద సంఖ్యలో వ్యాపారులు, చిన్నచిన్న వ్యాపారాలు చేసేవారు ఇక్కడికి చేరుకున్నారు. వీరి వల్ల పట్టణంలో వివిధ రకాల చెత్త పేరుకుపోయింది. గణేష్ ఉత్సవాల మొదటి రోజే సుమారు 15 టన్నుల చెత్త సేకరించాల్సి వచ్చిందని పురపాలక వర్గాలు పేర్కొన్నాయి.

వ్యాపారాలు చేయడంలో తప్పులేదని, అయితే సామాజిక బాధ్యతలో భాగంగా స్వీయ పారిశుధ్య నిర్వహణ కూడా జరగాల్సిన అవసరం ఉందని పురపాలక అధికారులు సూచిస్తున్నారు. వ్యాపారులు, ప్రజలు తమ బాధ్యతను నిర్వర్తిస్తున్నారా లేదా అన్న విషయంపై ఆలోచించాల్సిన సమయం వచ్చిందని వారు భావిస్తున్నారు.

ప్రొద్దుటూరు పురపాలక సంఘంలో సుమారు 12 నుంచి 18 వేల రూపాయల జీతం పొందే పారిశుధ్య కార్మికులు పనిచేస్తున్నారు. వీరికి అధిపతిగా కమిషనర్ ఉన్నారని, ఒక ఛానెల్ ప్రచారం చేసినట్టుగా ప్రజలు తప్పుడు దిశలో ఆలోచించకుండా, పారిశుధ్య నిర్వహణకు సహకరించాలని పురపాలక సంస్థ విజ్ఞప్తి చేసింది.

ఉదయం 3 గంటల నుంచే కమిషనర్ తూతిక శ్రీనివాస విశ్వనాధ్ తన సిబ్బందితో కలిసి వీధుల్లో పర్యటిస్తున్నట్లు తెలిపారు. పగలు భక్తులతో కిక్కిరిసే రోడ్లు, మరుసటి రోజు గణేష్ భక్తులకు చెత్తతో స్వాగతం పలకకుండా ఉండేందుకు పారిశుధ్య కార్మికులు యుద్ధంలో సైనికుల్లా రంగంలోకి దిగారని ఆయన పేర్కొన్నారు.

“ఉదయం 3 నుంచి కమిషనర్‌గా నేను నా సిబ్బంది వీధుల్లో తిరుగుతుంటే, పగలు భక్తులతో హడావిడిగా ఉన్న రోడ్లన్నీ చెత్తతో మరుసటి రోజు ప్రజలకు, గణేష్ భక్తులకు స్వాగతం పలకడం ఇష్టం లేక బాధ్యతగా పారిశుధ్య కార్మికులు యుద్ధంలో సైనికులుగా రంగంలోకి దిగారు. ఇది ప్రచారం అన్నా, రీల్స్ అన్నా మీ ఇష్టం. కానీ ఇది నిజం. దయచేసి ప్రజలు, వ్యాపారాలు పారిశుధ్య నిర్వహణకు, ప్లాస్టిక్ రహిత ప్రొద్దుటూరుకు సహకరించండి” అని కమిషనర్ తూతిక శ్రీనివాస విశ్వనాధ్ విన్నపం చేశారు.

గణేష్ ఉత్సవాల సమయంలో పెరిగే చెత్తను తగ్గించేందుకు ప్లాస్టిక్ వినియోగాన్ని తగ్గించాలని, చెత్తను ఎక్కడ పడితే అక్కడ వేయకుండా నిర్ణీత ప్రదేశాల్లోనే వేయాలని పురపాలక సంస్థ మరోసారి ప్రజలకు సూచించింది. పారిశుధ్య కార్మికుల శ్రమ వృథా కాకుండా ఉండాలంటే ప్రతి ఒక్కరూ తమ వంతు బాధ్యతను నిర్వర్తించాలని అధికారులు కోరుతున్నారు.