రాయలసీమ న్యూస్, వై.యస్.ఆర్: ప్రొద్దుటూరు వన్ టౌన్ పోలీస్ స్టేషన్ పరిధిలో జరిగిన బంగారు గొలుసు దొంగతనం కేసును పోలీసులు ఛేదించారు. ఈ ఘటనకు సంబంధించి ముద్దాయి బల్ల దస్తగిరి రెడ్డిని అరెస్ట్ చేసి, దొంగిలించిన బంగారు తాళి బొట్టు సరుడును స్వాధీనం చేసుకున్నారు. ఈ కేసు ప్రొద్దటూరు 1 టౌన్ PS లో Cr.No.148/2026 U/s 305(a) BNS కింద నమోదు చేశారు.
పోలీసుల సమాచారం ప్రకారం, ఫిర్యాదుదారు బద్వేలి గంగమ్మ (వయస్సు 60 సంవత్సరాలు), భర్త లేట్ గురివి రెడ్డి, రెడ్డిగారి వీధి, రామేశ్వరం, ప్రొద్దుటూరు టౌన్లో నివాసం ఉంటున్నారు. గంగమ్మకు కుటుంబ సభ్యులు ఎవరూ లేకపోవడంతో రామేశ్వరం ప్రాంతంలోని రెడ్డిగారి వీధిలో అద్దె ఇంటికి మారేందుకు నిర్ణయించుకున్నారు.
ఇంటి సామాన్లు షిఫ్ట్ చేయడానికి ఆమె తన పెద్దమ్మ కొడుకైన బల్ల దస్తగిరి రెడ్డిని సహాయం కోసం పిలిచారు. బల్ల దస్తగిరి రెడ్డి (వయస్సు 40 సంవత్సరాలు), తండ్రి ఈశ్వర్ రెడ్డి, బంగారయ్య కొట్టాలు, ప్రొద్దుటూరు టౌన్లో నివాసం ఉంటున్నారు.
ఉదయం సమయంలో ఇంటి సామాన్లు మారుస్తూ ఉండగా, గంగమ్మకు తెలియకుండా ఇంట్లో ఉన్న బంగారు తాళి బొట్టు సరుడును ముద్దాయి దొంగిలించినట్లు పోలీసులు తెలిపారు. ఇంటి మార్పు పనులు పూర్తయ్యాక గంగమ్మ తన బంగారు తాళి బొట్టు కనిపించకపోవడంతో అనుమానం వచ్చి, వెంటనే ప్రొద్దటూరు 1 టౌన్ PS కు వెళ్లి ఫిర్యాదు చేశారు.
ఫిర్యాదుదారు ఇచ్చిన వివరాల ఆధారంగా పోలీసులు కేసు నమోదు చేసి దర్యాప్తు ప్రారంభించారు. విచారణలో భాగంగా ముద్దాయి బల్ల దస్తగిరి రెడ్డిని అదుపులోకి తీసుకుని ప్రశ్నించగా, దొంగతనం చేసిన విషయాన్ని వెలికితీశారు. అనంతరం అతడి వద్ద నుంచి బంగారు తాళి బొట్టు సరుడును స్వాధీనం చేసుకున్నారు.
పోలీసుల ప్రకారం, స్వాధీనం చేసిన బంగారు తాళి బొట్టు సరుడు బరువు 20.03 గ్రాములు (సుమారు 2 తులాలు) ఉండగా, దాని విలువ సుమారు రూ.2,00,000గా అంచనా వేశారు. కేసు సంబంధిత మరిన్ని చట్టపరమైన చర్యలు కొనసాగుతున్నాయని ప్రొద్దటూరు 1 టౌన్ PS అధికారులు తెలిపారు.
ఈ ఘటనతో కుటుంబ సభ్యుల మధ్య నమ్మకాన్ని దెబ్బతీసే విధంగా జరిగే ఆస్తి నేరాలపై ప్రజలు అప్రమత్తంగా ఉండాలని, ఇలాంటి సందర్భాల్లో వెంటనే పోలీసులకు సమాచారం ఇవ్వాలని అధికారులు సూచిస్తున్నారు.
