రాయలసీమ న్యూస్, వై.యస్.ఆర్: ప్రొద్దుటూరు: ప్రొద్దుటూరు పురపాలక సంఘం ఆధ్వర్యంలో నడుస్తున్న పెట్రోల్ బంక్లో చోటుచేసుకున్న భారీ ఆర్థిక అవకతవకల కేసు విచారణలో పురోగతి లేకపోవడం స్థానికంగా చర్చనీయాంశంగా మారింది. బంక్ నిర్వహణలో రూ.1.23 కోట్ల మేర నిధుల అక్రమ వినియోగం జరిగినట్లు వెలుగులోకి వచ్చినప్పటికీ, విచారణలు సాగుతున్న పేరుతో కాలయాపన జరుగుతోందని విమర్శలు వినిపిస్తున్నాయి.
పురపాలక పెట్రోల్ బంక్లో అప్పట్లో మేనేజర్గా పనిచేసిన ప్రవీణ్కుమార్ ఇష్టారీతిన వ్యవహరించినట్లు ఆరోపణలు ఉన్నాయి. గత ఏడాది నవంబరులో ఈ అవకతవకల విషయం బయటపడింది. కొందరు ప్రైవేట్ ట్రావెల్స్ యజమానులకు అప్పుల రూపంలో ఇంధనం ఇచ్చి, ఆ నగదు వసూలు కావాల్సి ఉందని తొలుత అధికారులు భావించారు.
ఈ నేపథ్యంలో స్థానిక ఎమ్మెల్యే వరదరాజులురెడ్డి సూచన మేరకు పుర కమిషనర్ రవిచంద్రారెడ్డి పోలీసులకు ఫిర్యాదు చేశారు. ఫిర్యాదు ఆధారంగా పోలీసులు ప్రవీణ్కుమార్ను అరెస్టు చేశారు. అనంతరం పోలీసులు చేపట్టిన దర్యాప్తులో పంప్ బాయ్ల నుంచి కొందరు అధికారుల వరకు ఈ అవకతవకల్లో పాత్ర ఉన్నట్లు బయటపడింది.
ఇంతవరకు దర్యాప్తు సజావుగా సాగినట్టే కనిపించినా, ఆ తర్వాతి పరిణామాలు అనుమానాలకు తావిస్తున్నాయి. విచారణల పేరుతో కాలయాపన చేస్తూ, విషయాన్ని అటకెక్కిస్తున్నారనే ఆరోపణలు వినిపిస్తున్నాయి. అవకతవకల లెక్కలు తేల్చడం, వివిధ స్థాయిల్లో ఎవరి పాత్ర ఉందనే విషయంపై స్పష్టతకు రావడంలో ఆలస్యం అవుతోంది.
ఈ కేసు విచారణ కోసం పలు కమిటీలు ఏర్పాటు చేసినప్పటికీ, ఏ ఒక్క బృందం కూడా పూర్తిస్థాయిలో రికార్డులను పరిశీలించి లెక్కలను ఖరారు చేయలేకపోయింది. ఒక విచారణ బృందం పని పూర్తి కాకముందే మరో బృందాన్ని నియమించడం గందరగోళానికి దారితీస్తోందని స్థానిక వర్గాలు వ్యాఖ్యానిస్తున్నాయి.
ఇటీవల పురపాలక రీజినల్ డైరెక్టర్ సూచనల మేరకు రాష్ట్ర ఆడిట్ శాఖ ప్రత్యేక విచారణ బృందాన్ని ఏర్పాటు చేసింది. ఈ బృందం మూడుసార్లు పుర కార్యాలయాన్ని సందర్శించినప్పటికీ, గణనీయమైన పురోగతి సాధించలేకపోయింది. రికార్డులు పరిశీలించడమే తప్ప, స్పష్టమైన నివేదిక వెలువడకపోవడం ప్రశ్నార్థకంగా మారింది.
స్థానిక సహాయక అకౌంట్ అధికారి సుమారు ఆరు నెలల పాటు రికార్డులను పరిశీలించి, తన నివేదికను పుర కమిషనర్ రవిచంద్రారెడ్డికి సమర్పించారు. ఆ తర్వాత పురపాలక రీజినల్ డైరెక్టర్ రెండు సార్లు రికార్డులను పరిశీలించి, నివేదిక ఇస్తానని తెలిపినట్లు సమాచారం. అయితే ఆర్డీ విచారణ పూర్తికాకముందే 11 మందితో కూడిన మరో విచారణ బృందాన్ని నియమించారు.
ఈ కొత్త బృందం పుర కార్యాలయాన్ని ఒకసారి సందర్శించి రికార్డులను పరిశీలించి తిరిగి వెళ్లిపోయింది. వరుసగా బృందాలు వస్తున్నా, స్పష్టమైన నిర్ణయాలు, చర్యలు లేకపోవడం వల్ల పెట్రోల్ బంక్ అవకతవకల కేసు పరిష్కారం ఎప్పటికీ అనే ప్రశ్న స్థానికంగా వినిపిస్తోంది.
