రాయలసీమ న్యూస్, వై.యస్.ఆర్: ప్రొద్దుటూరు పట్టణంలోని సచివాలయాల్లో కనీస వసతులు లేకపోవడంతో ఉద్యోగులు, ప్రజలు తీవ్ర ఇబ్బందులు ఎదుర్కొంటున్నారు. ముఖ్యంగా నూతన పెన్షన్ దరఖాస్తుల కోసం సచివాలయానికి వచ్చే వృద్ధులు, పేద ప్రజలు సేవలు పొందలేక ఇబ్బంది పడుతున్నట్టు స్థానికులు చెబుతున్నారు.
సచివాలయంలో ప్రింటర్లు పనిచేయకపోవడం, కంప్యూటర్లు సరిగా పనిచేయకపోవడం వల్ల అవసరమైన పత్రాల నమోదు, ముద్రణ పనులు నిలిచిపోయాయి. దీనిపై సచివాలయ సిబ్బంది ఆగ్రహం వ్యక్తం చేస్తున్నారు. నూతన పెన్షన్ దరఖాస్తుల కోసం అవసరమైన కుల ధ్రువీకరణ, ఆదాయం ధ్రువీకరణ పత్రాలను సచివాలయంలో నమోదు చేయలేమని, ప్రజలు మీసేవ కేంద్రాల ద్వారా నమోదు చేసుకోవాలని సిబ్బంది సూచిస్తున్నారని స్థానికులు పేర్కొంటున్నారు.
సచివాలయాల్లో ఏర్పాటు చేయాల్సిన కనీస సదుపాయాలు అందుబాటులో లేకపోవడం వల్ల ఉద్యోగులు కూడా తీవ్ర ఒత్తిడిలో ఉన్నారు. ప్రింటర్లు, కంప్యూటర్లు పనిచేయకపోవడంతో ఉన్నతాధికారులకు సమస్యను పూర్తిగా వివరించలేక, మరోవైపు సేవలు పొందలేక తిరిగి వెళ్లే ప్రజలకు సమాధానం చెప్పలేక సచివాలయ అధికారులు, సిబ్బంది ఇరుకులో పడుతున్న పరిస్థితి నెలకొంది.
సచివాలయ ఉద్యోగస్తులకు కనీస వసతులు కల్పించడంలో ప్రొద్దుటూరు మునిసిపల్ కమిషనర్ విఫలమయ్యారని స్థానికులు ఆరోపిస్తున్నారు. సచివాలయ వ్యవస్థను బలోపేతం చేయాల్సిన సమయంలో, ప్రాథమిక సదుపాయాలే లేని పరిస్థితి కొనసాగడం పట్ల ప్రజలు అసంతృప్తి వ్యక్తం చేస్తున్నారు. ముఖ్యంగా వృద్ధాప్య, వికలాంగ, విధవ పెన్షన్ల కోసం వచ్చే లబ్ధిదారులు రోజూ తిరుగుతూ, అవసరమైన పత్రాలు సమర్పించలేక ఇబ్బందులు పడుతున్నారని వారు చెబుతున్నారు.
సచివాలయాల్లో కనీస వసతులు, ముఖ్యంగా కంప్యూటర్లు, ప్రింటర్లు, ఇంటర్నెట్ సదుపాయాలు, విద్యుత్ సరఫరా వంటి అంశాలను తక్షణమే సరిచేయాలని, ప్రజలకు ఇబ్బందులు లేకుండా సేవలు అందేలా చూడాలని స్థానికులు, సచివాలయ సిబ్బంది కోరుతున్నారు. ప్రొద్దుటూరు మునిసిపల్ కమిషనర్ ఈ సమస్యపై స్పందించి, అవసరమైన చర్యలు తీసుకోవాలని వారు డిమాండ్ చేస్తున్నారు.
