రాయలసీమ న్యూస్, వై.యస్.ఆర్: కడప జిల్లా ప్రొద్దుటూరులో శ్రీనివాసనగర్లో నిర్మాణంలో ఉన్న విద్యుత్ సబ్స్టేషన్ పనులపై ఎమ్మెల్యే వరదరాజుల రెడ్డి స్పందించారు. సబ్స్టేషన్ పనులను పదేపదే నిలిపివేయడం పట్ల ఆయన ఆందోళన వ్యక్తం చేశారు. జిల్లా కలెక్టర్ ఇచ్చిన హామీతో తాను చేపట్టాలని నిర్ణయించిన ధర్నాను విరమించుకున్నట్లు తెలిపారు.
ప్రొద్దుటూరు శ్రీనివాసనగర్లో జరుగుతున్న విద్యుత్ సబ్స్టేషన్ నిర్మాణ పనులు ఇప్పటికే సుమారు 80 శాతం పూర్తయ్యాయని వరదరాజుల రెడ్డి వివరించారు. సబ్స్టేషన్ నిర్మాణం జరుగుతున్న స్థలం ప్రైవేట్ భూమి అని ఒక వ్యక్తి జిల్లా కలెక్టర్ను ఆశ్రయించగా, సంబంధిత భూమి ప్రభుత్వానికి చెందినదేనని కలెక్టర్ ఉత్తర్వులు జారీ చేసినట్లు ఆయన పేర్కొన్నారు.
టీడీపీ ప్రభుత్వం అధికారంలోకి వచ్చిన తర్వాత నిలిచిపోయిన సబ్స్టేషన్ పనులను మళ్లీ ప్రారంభించినట్లు ఎమ్మెల్యే తెలిపారు. అయితే అనంతరం జిల్లా విద్యుత్ శాఖ అధికారి మరోసారి పనులను నిలిపివేశారని ఆయన ఆరోపించారు. దీనిపై నిరసనగా ధర్నా చేపట్టాలని తాను నిర్ణయించుకున్నప్పటికీ, జిల్లా కలెక్టర్ స్వయంగా ఫోన్ చేసి పనులను తిరిగి ప్రారంభిస్తామని హామీ ఇవ్వడంతో ధర్నా కార్యక్రమాన్ని విరమించుకున్నట్లు వరదరాజుల రెడ్డి చెప్పారు.
ప్రొద్దుటూరు అభివృద్ధి కోసం ప్రతి ఒక్కరూ రాజకీయ భేదాభిప్రాయాలకు అతీతంగా సహకరించాలని ఎమ్మెల్యే వరదరాజుల రెడ్డి కోరారు. ప్రజలకు అవసరమైన మౌలిక సదుపాయాల కల్పనలో భాగంగా విద్యుత్ సబ్స్టేషన్ నిర్మాణం అత్యంత కీలకమని ఆయన అభిప్రాయపడ్డారు. పనులు పూర్తయిన తర్వాత ప్రాంతీయ ప్రజలకు విద్యుత్ సరఫరా మరింత స్థిరంగా, నిరంతరంగా అందుబాటులోకి వస్తుందని ఆయన ఆశాభావం వ్యక్తం చేశారు.
ఈ కార్యక్రమంలో టిడిపి రాష్ట్ర ప్రధాన కార్యదర్శి వి ఎస్ ముక్తయర్, ఈఈ చాంద్ భాషా, మాజీ పట్టణ అధ్యక్షుడు ఈవి సుధాకర్ రెడ్డి, ఖలీల్ తదితరులు పాల్గొన్నారు. స్థానిక నాయకులు, కార్యకర్తలు సబ్స్టేషన్ పనులు త్వరితగతిన పూర్తయ్యేలా సంబంధిత శాఖలతో సమన్వయం కొనసాగించాలని ఎమ్మెల్యే సూచించినట్లు సమాచారం.
