రాయలసీమ న్యూస్, వై.యస్.ఆర్: ప్రొద్దుటూరు, ప్రొద్దుటూరు తహసీల్దార్ కార్యాలయంలో ప్రజల నుంచి, కలెక్టర్ కార్యాలయం నుంచి వచ్చే అర్జీలు, ఫిర్యాదులను సకాలంలో పరిష్కరించకుండా రెవెన్యూ అధికారులు కాలయాపన చేస్తున్నారని టీడీపీ బీసీ సెల్ రాష్ట్ర కార్యదర్శి సుంకర వేణుగోపాల్ ఆరోపించారు. ఈ మేరకు మంగళవారం జమ్మలమడుగు ఆర్డీవో ఏవో ఇక్బాల్కు ఫిర్యాదు చేసి, సంబంధిత రెవెన్యూ సిబ్బందిపై చర్యలు తీసుకోవాలని కోరారు.
ప్రొద్దుటూరు పరిధిలో పనిచేస్తున్న ఆర్ఐ నాగమోహన్రెడ్డి, వీఆర్వో రామయ్య తదితర రెవెన్యూ సిబ్బంది ప్రజల నుంచి అందుతున్న అర్జీలపై సకాలంలో స్పందించడం లేదని, సమస్యల పరిష్కారానికి నెలల తరబడి సమయం తీసుకుంటున్నారని ఫిర్యాదుదారులు పేర్కొన్నారు. తహసీల్దార్ను సమస్యలపై సంప్రదించినప్పుడు ఆర్ఐ, వీఆర్వోలను పిలిపించి పరిష్కరించాలని సూచిస్తున్నప్పటికీ, క్షేత్రస్థాయిలో సమస్యలు పరిష్కారం కాకుండా ప్రజలను కార్యాలయాల చుట్టూ తిప్పుకుంటున్నారని వారు ఆరోపించారు.
తమ సమస్యలపై అధికారులను సంప్రదించినప్పుడు గతంలో ఇచ్చిన అర్జీల వివరాలు గుర్తు లేవని, మళ్లీ వివరాలు చెప్పాలని సమాధానాలు వస్తున్నాయని ఫిర్యాదుదారులు తెలిపారు. దీంతో ప్రజలు తీవ్ర ఇబ్బందులు ఎదుర్కొంటున్నారని వారు పేర్కొన్నారు.
తాలమాపురం గ్రామ పరిధిలోని పొలంలో ప్రభుత్వ భూమి ఆక్రమణపై కూడా చర్యలు లేకపోవడాన్ని సుంకర వేణుగోపాల్ ప్రస్తావించారు. తాలమాపురం ప్రాంతంలో ప్రభుత్వ భూమిని ఆక్రమించారని తాను కలెక్టర్ కార్యాలయ గ్రీవెన్స్లో ఫిర్యాదు చేసినట్లు ఆయన తెలిపారు. ఇప్పటికే సుమారు మూడుసార్లు ఫిర్యాదు చేసినప్పటికీ సమస్యపై తగిన చర్యలు తీసుకోకుండా కాలయాపన చేస్తున్నారని ఆయన ఆరోపించారు.
ఈ ఫిర్యాదుపై సంబంధిత అధికారులు క్షేత్రస్థాయిలో విచారణ జరిపి, నిబంధనల ప్రకారం త్వరితగతిన చర్యలు తీసుకోవాలని సుంకర వేణుగోపాల్ కోరారు. ప్రజల సమస్యలను సకాలంలో పరిష్కరించేలా రెవెన్యూ సిబ్బందికి స్పష్టమైన ఆదేశాలు ఇవ్వాలని, విధుల్లో నిర్లక్ష్యం చేస్తున్నట్లు తేలితే బాధ్యులపై శాఖాపరమైన చర్యలు తీసుకోవాలని ఆర్డీవో అధికారులను వారు అభ్యర్థించారు.
ప్రజలకు అందుబాటులో ఉండే, వారి సమస్యలను శ్రద్ధగా విని పరిష్కరించే విధంగా రెవెన్యూ వ్యవస్థను పటిష్టం చేయాలని ఫిర్యాదుదారులు విజ్ఞప్తి చేశారు. ఈ కార్యక్రమంలో టీడీపీ బీసీ సెల్ రాష్ట్ర కార్యదర్శి సుంకర వేణుగోపాల్, ఎస్సీ సెల్ నాయకుడు, జిల్లా కార్యదర్శి లింగాపురం బాలయ్య, బీసీ నాయకుడు మహేష్ కుమార్, పుల్లగూర సుబ్బరాయుడు తదితరులు పాల్గొన్నారు.
