రాయలసీమ న్యూస్, వై.యస్.ఆర్: ప్రొద్దుటూరు పట్టణంలో రాపిడో బైక్, ఆటో సేవలను గురువారం అధికారికంగా ప్రారంభించారు. ప్రభుత్వ పాలిటెక్నిక్ కళాశాల మైదానంలో జరిగిన కార్యక్రమంలో స్థానిక ఎమ్మెల్యే నంద్యాల వరదరాజులరెడ్డి ఈ సేవలను ప్రారంభించి, రాపిడో నిర్వహణ, రైడర్లతో పరస్పర మంతనాలు జరిపారు.
స్థానిక యువతకు ఉపాధి అవకాశాలు పెంచడంతో పాటు ప్రజలకు చవకైన, సులభమైన రవాణా సౌకర్యం అందించడమే రాపిడో సేవల ముఖ్య ఉద్దేశమని ఎమ్మెల్యే నంద్యాల వరదరాజులరెడ్డి తెలిపారు. పట్టణంలో పెరుగుతున్న రవాణా అవసరాలను దృష్టిలో పెట్టుకుని ఈ సేవలు ప్రారంభించడం సానుకూల పరిణామమని ఆయన అభిప్రాయపడ్డారు.
రాపిడోలో పనిచేసే రైడర్లకు (కెప్టెన్లు) సంస్థ రూ. 5 లక్షల ప్రమాద బీమా సౌకర్యం కల్పించడాన్ని ఎమ్మెల్యే అభినందించారు. రైడర్ల భద్రత, ఆర్థిక రక్షణకు ఈ బీమా ఉపయోగపడుతుందని, సేవలపై ప్రజల్లో నమ్మకం పెరగడానికి ఇది తోడ్పడుతుందని పేర్కొన్నారు.
బైక్, ఆటో డ్రైవర్లు తప్పనిసరిగా ట్రాఫిక్, భద్రతా నిబంధనలు పాటించాలని ఎమ్మెల్యే సూచించారు. ప్రయాణికులను సురక్షితంగా గమ్యస్థానాలకు చేర్చడం తమ మొదటి బాధ్యతగా భావించాలని, హెల్మెట్, ఇతర భద్రతా పరికరాల వినియోగంలో ఎలాంటి అలసత్వం చూపకూడదని ఆయన స్పష్టం చేశారు.
కార్యక్రమంలో భాగంగా రాపిడో కెప్టెన్లకు ఎమ్మెల్యే నంద్యాల వరదరాజులరెడ్డి హెల్మెట్లను పంపిణీ చేశారు. రైడర్లు భద్రతా ప్రమాణాలను కచ్చితంగా పాటించేలా ఈ చర్య ఉపయోగపడుతుందని నిర్వాహకులు తెలిపారు.
తరువాత రాపిడో సిబ్బంది, రైడర్లతో కలిసి పట్టణంలో నిర్వహించిన బైక్ ర్యాలీని ఎమ్మెల్యే ప్రారంభించారు. ర్యాలీ పట్టణంలోని ప్రధాన వీధుల గుండా సాగి, రాపిడో సేవల ప్రారంభాన్ని ప్రజలకు తెలియజేసేలా నిర్వహించారు.
స్థానిక ప్రజలు ఈ సేవలను సద్వినియోగం చేసుకోవాలని, రాపిడో ద్వారా అందుబాటులోకి వచ్చిన చవకైన రవాణా సౌకర్యాన్ని ఉపయోగించుకోవడంతో పాటు ట్రాఫిక్ నియమాల పట్ల అవగాహన పెంచుకోవాలని ఎమ్మెల్యే నంద్యాల వరదరాజులరెడ్డి కోరారు.
