రాయలసీమ న్యూస్, వై.యస్.ఆర్: ప్రొద్దుటూరు: గోపవరం పంచాయతీ పరిధిలోని 14వ వార్డు శ్రీనివాసపురంలో దీర్ఘకాలంగా కొనసాగుతున్న రహదారి, డ్రైనేజీ సమస్యలను పరిష్కరించేందుకు కృషి చేస్తానని జనసేన పార్టీ నాయకుడు మాదాసు మురళి తెలిపారు. స్థానికుల విజ్ఞప్తి మేరకు శుక్రవారం ఆయన శ్రీనివాసపురాన్ని సందర్శించి అక్కడి పరిస్థితులను ప్రత్యక్షంగా పరిశీలించారు.
ఈ సందర్భంగా స్థానికులు దరిశ నారాయణ, స్కాలర్స్ బాల సుబ్బారెడ్డి, కందుకూరు భాష తదితరులు ప్రాంతీయ సమస్యలను వివరించారు. శ్రీనివాసపురంలోని ప్రధాన రహదారి సుమారు 20 ఏళ్లుగా అధ్వానంగా ఉండి, వర్షాకాలంలో మరింత దారుణ స్థితికి చేరుకుంటోందని వారు తెలిపారు. ఈ మార్గంలో స్కాలర్స్ స్కూల్, భాష్యం స్కూల్తో పాటు పలు విద్యాసంస్థలు ఉండటంతో ప్రతిరోజూ విద్యార్థులు, తల్లిదండ్రులు, స్థానికులు రాకపోకలు సాగిస్తున్నారని, రహదారి దుస్థితి కారణంగా తీవ్ర ఇబ్బందులు ఎదుర్కొంటున్నారని వివరించారు.
డ్రైనేజీ వ్యవస్థ కూడా సక్రమంగా లేకపోవడంతో మురుగు నీరు రహదారిపైకి చేరి సమస్యలు మరింత తీవ్రమవుతున్నాయని స్థానికులు పేర్కొన్నారు. డ్రైనేజీపై ఉన్న ఆక్రమణలను తొలగించి, వ్యవస్థను పునర్వ్యవస్థీకరించి నీటి ప్రవాహం సజావుగా ఉండేలా చర్యలు తీసుకోవాలని వారు కోరారు.
స్థానికుల వివరాలను విన్న మాదాసు మురళి సమస్యల పరిష్కారంపై స్పందించారు. రహదారి, డ్రైనేజీ సమస్యలను తొలుత స్థానిక ఎమ్మెల్యే నంద్యాల వరదరాజు రెడ్డి దృష్టికి తీసుకెళ్లి, అవసరమైన నిధులు మంజూరు అయ్యేలా, పనులు ప్రారంభం అయ్యేలా ప్రయత్నాలు చేస్తానని ఆయన తెలిపారు. సమస్య పరిష్కారానికి స్థానిక స్థాయిలో చర్యలు ఆలస్యమైతే, పంచాయతీరాజ్ శాఖ మంత్రి పవన్ కళ్యాణ్ దృష్టికి కూడా ఈ అంశాన్ని తీసుకెళ్లి పరిష్కారానికి కృషి చేస్తానని హామీ ఇచ్చారు.
ప్రజలకు ఏ సమస్య ఉన్నా నందిని క్లాత్ మార్కెట్లోని జనసేన పార్టీ కార్యాలయాన్ని లేదా తెలుగుదేశం పార్టీ కార్యాలయాన్ని సంప్రదించి తెలియజేయవచ్చని మాదాసు మురళి సూచించారు. ప్రజల సమస్యలను సంబంధిత అధికారుల దృష్టికి తీసుకెళ్లి పరిష్కారం కోసం పార్టీ తరఫున నిరంతరం కృషి చేస్తామని ఆయన పేర్కొన్నారు.
ఈ కార్యక్రమంలో జనసేన నాయకులు అల్లం చంద్రశేఖర్, రవిశంకర్ రెడ్డి, యువజన నాయకులు వరికూటి నాగార్జున, హరీష్ తదితరులు పాల్గొన్నారు. స్థానికులు సమస్యల పరిష్కారంపై ఆశాభావం వ్యక్తం చేశారు.
