రాయలసీమ న్యూస్, వై.యస్.ఆర్: ప్రొద్దుటూరు పట్టణంలో ప్రభుత్వం అమలు చేస్తున్న సంక్షేమ కార్యక్రమాలు క్షేత్రస్థాయిలో సక్రమంగా, సమర్థవంతంగా ప్రజలకు చేరాలంటే వార్డు సచివాలయ సిబ్బంది నిబద్ధతతో విధులు నిర్వహించాలని కమీషనర్ తూతిక శ్రీనివాస విశ్వనాధ్ సూచించారు. ఇటీవల కాలంలో వార్డు సచివాలయ సిబ్బంది ప్రజలకు అందుబాటులో ఉండడం లేదన్న ఫిర్యాదులు వస్తుండటంతో ఆయన స్పందించారు.
ప్రొద్దుటూరు ప్రజలకు మౌలిక సేవలు, సంక్షేమ పథకాలు, ప్రభుత్వ ప్రయోజనాలు అందించడంలో వార్డు సచివాలయ సిబ్బంది కీలక పాత్ర పోషిస్తున్నారని కమీషనర్ పేర్కొన్నారు. వార్డు సచివాలయాల ద్వారా సుమారు 580 సేవలు నేరుగా ప్రజలకు అందుతున్నాయని ఆయన వివరించారు.
ప్రత్యేకంగా 'వాట్సాప్ మిత్ర' ద్వారా ప్రజల ఇంటి ముంగిట్లోనే ప్రభుత్వ సేవలు చేరడం ఒక విప్లవాత్మక మార్పుగా నిలుస్తోందని కమీషనర్ అభిప్రాయపడ్డారు. ఈ విధానంతో ప్రజలకు సేవలు మరింత వేగంగా, పారదర్శకంగా అందుతున్నాయని ఆయన అన్నారు.
ప్రజలకు సంతృప్తికర స్థాయిలో సేవలు అందించి పీపుల్ పాజిటివ్ పెరసెప్షన్ (పిపిపి) పెంచేందుకు వార్డు సచివాలయ సిబ్బంది మరింత కృషి చేయాలని కమీషనర్ ఆదేశించారు. ప్రజలలో ప్రభుత్వంపై, స్థానిక సంస్థలపై సానుకూల అభిప్రాయం పెరగాలంటే సేవల నాణ్యత, అందుబాటు కీలకమని ఆయన స్పష్టం చేశారు.
ఎన్ని పనులున్నా సచివాలయ సిబ్బంది ప్రతిరోజూ సాయంత్రం 3 గంటల నుంచి 5 గంటల వరకు తప్పనిసరిగా వార్డు సచివాలయంలోనే ఉండాలని, ఈ సమయంలో ప్రజలు ఇచ్చే ఫిర్యాదులు స్వీకరించి నమోదు చేయాలని కమీషనర్ తూతిక శ్రీనివాస విశ్వనాధ్ ఆదేశించారు. ప్రజలకు సౌలభ్యం కల్పించేలా ఈ సమయాన్ని కచ్చితంగా పాటించాలని ఆయన సూచించారు.
త్వరలో వార్డు సచివాలయ సిబ్బందితో సమీక్షా సమావేశం నిర్వహించి, ప్రొద్దుటూరు పురజనులకు మరింత మెరుగైన సేవలు అందించేందుకు అవసరమైన చర్యలు చేపడతామని కమీషనర్ తెలిపారు. ప్రజల ఫిర్యాదులు, సూచనలను పరిగణలోకి తీసుకుని సేవల వ్యవస్థను బలోపేతం చేయనున్నట్లు ఆయన పేర్కొన్నారు.
