రాయలసీమ న్యూస్, అగ్రికల్చర్ డెస్క్: ఆంధ్రప్రదేశ్‌లో కరువు పరిస్థితులు తీవ్ర ఆందోళనకు గురి చేస్తున్నాయి. జూన్‌ నుంచి ఆగస్టు వరకు సాధారణం కంటే గణనీయంగా తక్కువ వర్షపాతం నమోదవడంతో రాష్ట్రవ్యాప్తంగా నీటి వనరులు ఎండిపోతున్నాయి. పంటలు ఎండిపోవడం, భూగర్భ జలాలు దిగజారడం, ప్రాజెక్టుల్లో నిల్వలు తగ్గిపోవడం రైతాంగాన్ని కష్టాల్లోకి నెట్టింది.
రాష్ట్ర ప్రభుత్వ తాజా అంచనాల ప్రకారం, జూన్‌ నుంచి ఆగస్టు వరకు ఆంధ్రప్రదేశ్‌లో 53.4 శాతం వర్షపాతం లోటు నమోదైంది. సాధారణంగా ఈ కాలంలో కురవాల్సిన వర్షానికి సగం కూడా పడకపోవడంతో పలు ప్రాంతాల్లో నేల చిట్లిపోయే స్థాయికి ఎండలు తీవ్రతరం అయ్యాయి.
ఈ నేపథ్యంలో ప్రభుత్వం 21 జిల్లాల్లోని 388 మండలాలను కరువు ప్రభావిత ప్రాంతాలుగా ప్రకటించింది. వీటిలో 283 మండలాలను తీవ్రమైన కరువు మండలాలుగా, 105 మండలాలను సాధారణ కరువు మండలాలుగా వర్గీకరించింది. దీంతో ఆ మండలాల్లో పంటలు, పశువుల సంరక్షణ, తాగునీటి సరఫరా వంటి అంశాలపై ప్రత్యేక చర్యలు తీసుకునే అవకాశముంది.
సెప్టెంబరు 16 వరకు రాష్ట్రంలో సాధారణంగా 490.94 మిల్లీమీటర్ల వర్షపాతం నమోదవాలి. అయితే ప్రస్తుత సీజన్‌లో ఇప్పటివరకు కేవలం 244.69 మిల్లీమీటర్ల వర్షపాతం మాత్రమే పడింది. అంటే సగానికి పైగా వర్షాభావం కొనసాగుతోంది. ఈ పరిస్థితులు కొనసాగితే రబీ సీజన్‌ పంటలపైనా ప్రభావం పడే అవకాశముందని వ్యవసాయ వర్గాలు ఆందోళన వ్యక్తం చేస్తున్నాయి.
వర్షాభావం కారణంగా ప్రధాన ప్రాజెక్టులు, ఆనకట్టలు, చెరువుల్లో నీటి నిల్వలు గణనీయంగా తగ్గిపోయాయి. సాగునీటి విడుదలకు అవసరమైన స్థాయిలో నిల్వలు లేకపోవడంతో రైతులు బోర్లు, ఓపెన్‌ వెల్‌లపై ఆధారపడుతున్నారు. అయితే భూగర్భ జలాలు కూడా వేగంగా దిగజారుతున్నాయని నివేదికలు సూచిస్తున్నాయి. పలుచోట్ల బోర్లు ఎండిపోవడం, కొత్త బోర్లు త్రవ్వినా నీరు రాకపోవడం వంటి సమస్యలు తలెత్తుతున్నాయి.
ప్రస్తుత పరిస్థితుల్లో కరువు మండలాలుగా ప్రకటించిన ప్రాంతాల్లో ఉపాధి హామీ పనులు, తాగునీటి సరఫరా, పశువులకు మేత, మేత నిల్వల ఏర్పాటుతో పాటు రైతులకు అవసరమైన సహాయ చర్యలపై ప్రభుత్వం దృష్టి సారించాల్సిన అవసరం ఉందని నిపుణులు సూచిస్తున్నారు. వర్షాభావం కొనసాగితే పరిస్థితి మరింత క్లిష్టంగా మారే ప్రమాదం ఉందని హెచ్చరిస్తున్నారు.
