రాయలసీమ న్యూస్, అనంతపురం:
ప్రతి ఒక్కరి జీవితంలో యోగా భాగం కావాలి: అనంతపురం కలెక్టర్ ఆనంద్
అనంతపురం: సంపూర్ణ ఆరోగ్యం కోసం యోగాను ప్రతి ఒక్కరి దైనందిన జీవితంలో భాగంగా చేసుకోవాలని అనంతపురం జిల్లా కలెక్టర్ ఆనంద్ పిలుపునిచ్చారు. యోగాంధ్ర కార్యక్రమం భాగంగా సోమవారం అనంతపురం పోలీస్ పెరేడ్ మైదానంలో నిర్వహించిన యోగాసనాల కార్యక్రమంలో ఆయన పాల్గొన్నారు.
ఈ కార్యక్రమంలో కలెక్టర్ ఆనంద్ దివ్యాంగులతో కలిసి పలు యోగాసనాలు చేశారు. వివిధ శాఖల అధికారులు, విద్యార్థులు, సిబ్బంది పెద్ద సంఖ్యలో హాజరై యోగాసనాలు ఆచరించారు. యోగాంధ్ర కార్యక్రమాన్ని గ్రామస్థాయికి విస్తరించేందుకు జిల్లా పరిపాలన చర్యలు చేపట్టినట్లు కలెక్టర్ తెలిపారు.
గ్రామ స్థాయి నుంచి ప్రజల్లో యోగా ప్రాముఖ్యతపై అవగాహన కల్పించేందుకు ప్రత్యేక కార్యక్రమాలు రూపొందించినట్లు ఆయన పేర్కొన్నారు. యోగాసనాలను అలవాటు చేసుకునేలా గ్రామ, వార్డు స్థాయిలో శిక్షణా కార్యక్రమాలు, ప్రదర్శనలు నిర్వహించేందుకు సంబంధిత అధికారులకు సూచనలు జారీ చేసినట్లు తెలిపారు.
జిల్లాలో మూడు ప్రాంతాల్లో ప్రత్యేకంగా భారీ స్థాయిలో యోగాసనాల కార్యక్రమాలు నిర్వహించేందుకు ప్రణాళికలు సిద్ధం చేసినట్లు కలెక్టర్ ఆనంద్ వివరించారు. అనంతపురం నగరంతో పాటు గుత్తి కోట, తాడిపత్రిలోని బుగ్గ రామలింగేశ్వర స్వామి ఆలయ సమీపంలో కూడా యోగాసనాల కార్యక్రమాలు నిర్వహించనున్నట్లు చెప్పారు.
యోగాసనాల సాధనతో శారీరక, మానసిక దృఢత్వం పెంపొందుతుందని కలెక్టర్ ఆనంద్ అభిప్రాయపడ్డారు. నిత్య సాధన ద్వారా ఒత్తిడి తగ్గి, ఏకాగ్రత పెరిగి, ఆరోగ్య సమస్యలను దూరం పెట్టుకోవచ్చని ఆయన సూచించారు. ముఖ్యంగా విద్యార్థులు, ఉద్యోగులు, వృద్ధులు యోగాను అలవాటు చేసుకోవాలని సూచించారు.
ప్రతి ఒక్కరి జీవితంలో యోగా ఒక భాగంగా మారాలని, కుటుంబ స్థాయిలోనే యోగాసనాల సాధనకు ప్రాధాన్యం ఇవ్వాలని కలెక్టర్ ఆనంద్ పిలుపునిచ్చారు. ప్రభుత్వం చేపడుతున్న యోగాంధ్ర వంటి కార్యక్రమాలను ప్రజలు సద్వినియోగం చేసుకోవాలని ఆయన కోరారు.
