రాయలసీమ న్యూస్, అనంతపురం: రాష్ట్ర వ్యాప్తంగా పనిచేస్తున్న జర్నలిస్టులు ఎదుర్కొంటున్న సమస్యలను పరిష్కరించేందుకు తాను కృషి చేస్తానని రాష్ట్ర ఆర్థిక శాఖ మంత్రి పయ్యావుల కేశవ్ తెలిపారు. అనంతపురంలో జరిగిన ఓ అవగాహన కార్యక్రమంలో ఆయన పాల్గొని మాట్లాడారు.
‘సమాజంపై సోషల్ మీడియా ప్రభావం’ అనే అంశంపై అనంతపురం నగరంలోని ఎస్ఆర్ కన్వెన్షన్ హాల్లో శనివారం నిర్వహించిన సమావేశాన్ని APUWJ జిల్లా అధ్యక్షుడు పయ్యావుల ప్రవీణ్ ఆధ్వర్యంలో ఏర్పాటు చేశారు. ఈ కార్యక్రమానికి మంత్రి పయ్యావుల కేశవ్, ప్రభుత్వ విప్ కాలువ శ్రీనివాసులు ముఖ్య అతిథులుగా హాజరయ్యారు.
సమావేశంలో మంత్రి పయ్యావుల కేశవ్ మాట్లాడుతూ సోషల్ మీడియాలో వెలువడుతున్న సమాచారంపై ప్రజలు అప్రమత్తంగా ఉండాల్సిన అవసరాన్ని ప్రస్తావించారు. సోషల్ మీడియాలో ఎంత నిజం ఉంటుందో, అంతే స్థాయిలో అబద్ధం కూడా ఉంటుందని ఆయన వ్యాఖ్యానించారు. నిజమైన సమాచారాన్ని ప్రజలకు చేరేలా అందరూ బాధ్యతగా వ్యవహరించాలని, అసత్య ప్రచారాలను ఖండించే దిశగా జర్నలిస్టులు, సామాజిక వర్గాలు ముందుకు రావాలని సూచించారు.
గతంలో ప్రజల సమస్యల పరిష్కారానికి జర్నలిస్టులతో కలిసి తాము పోరాడిన సందర్భాలను మంత్రి గుర్తుచేశారు. ప్రస్తుతం సీనియర్ జర్నలిస్టులు, అర్హులైన పాత్రికేయులు ఎదుర్కొంటున్న సంక్షేమ సంబంధిత అంశాలు తన దృష్టికి వచ్చాయని తెలిపారు. ముఖ్యంగా సీనియర్ జర్నలిస్టులకు పింఛను కల్పించాలన్న డిమాండ్, అర్హులైన జర్నలిస్టులందరికీ ఇంటి స్థలాల కేటాయింపు, గృహనిర్మాణం చేపట్టాలన్న అభ్యర్థనలను ప్రస్తావించారు.
ఈ సమస్యలన్నింటినీ సమగ్రంగా సమీక్షించి, రాష్ట్ర ముఖ్యమంత్రి చంద్రబాబు దృష్టికి తీసుకెళ్లి పరిష్కారానికి కృషి చేస్తానని మంత్రి హామీ ఇచ్చినట్లు కార్యక్రమంలో పాల్గొన్న వారు తెలిపారు.
కార్యక్రమంలో అనంతపురం జిల్లాకు చెందిన ఎమ్మెల్యేలు దగ్గుపాటి ప్రసాద్, అమిలినేని సురేంద్రబాబు, IJU జాతీయ అధ్యక్షుడు శ్రీనివాస్ రెడ్డి, ప్రధాన కార్యదర్శి సోమ సుందర్, APUWJ రాష్ట్ర అధ్యక్షుడు సుబ్బారావు తదితరులు పాల్గొన్నారు. జర్నలిస్టుల హక్కులు, బాధ్యతలు, సోషల్ మీడియా వల్ల వృత్తిపరంగా ఎదురవుతున్న సవాళ్లపై ఈ సందర్భంగా పలువురు ప్రతినిధులు అభిప్రాయాలు వ్యక్తం చేశారు.
