రాయలసీమ న్యూస్, ఆంధ్రప్రదేశ్ డెస్క్: ఆంధ్రప్రదేశ్ రాష్ట్ర పౌర సంబంధాల శాఖ ఆధ్వర్యంలో 2025 సంవత్సరానికి ఉత్తమ జర్నలిస్టు అవార్డుల కోసం దరఖాస్తులను ప్రభుత్వం ఆహ్వానించింది. ఈ మేరకు శాఖ సంచాలకులు KS విశ్వనాథన్ వివరాలు వెల్లడించారు.
మొత్తం 12 విభాగాల్లో జర్నలిస్టులకు ఈ అవార్డులు అందజేయనున్నట్లు ఆయన తెలిపారు. ప్రతి విభాగానికి నిర్ణయించిన నగదు పురస్కారాలు రూ.2 లక్షల నుంచి రూ.1 లక్ష వరకు ఉండనున్నాయని పేర్కొన్నారు. ముద్రిత, ఎలక్ట్రానిక్, డిజిటల్ తదితర రంగాల్లో విశిష్ట ప్రతిభ కనబరిచిన జర్నలిస్టులను గుర్తించి సత్కరించడం ఈ అవార్డుల ఉద్దేశ్యమని ఆయన వివరించారు.
అర్హులైన జర్నలిస్టులు సెప్టెంబరు 28 సాయంత్రం 5 గంటలలోగా దరఖాస్తులు సమర్పించాల్సి ఉంటుందని KS విశ్వనాథన్ తెలిపారు. గడువు తర్వత అందిన దరఖాస్తులను పరిగణనలోకి తీసుకోరని స్పష్టం చేశారు.
2025 సంవత్సరంలో ప్రచురితమైన లేదా ప్రసారమైన రచనలు, ఫొటోలు, వీడియోల ఆధారంగా ఎంపిక ప్రక్రియ కొనసాగనున్నట్లు ఆయన చెప్పారు. దరఖాస్తుతో పాటు కనీసం 5 రచనలు, ఫొటోలు లేదా వీడియోలను తప్పనిసరిగా జతచేయాలని సూచించారు. ఇవి సంబంధిత విభాగంలో అభ్యర్థి ప్రతిభను ప్రతిబింబించేలా ఉండాలని పేర్కొన్నారు.
దరఖాస్తు విధానం, విభాగాల వారీ అర్హత ప్రమాణాలు, అవసరమైన ధ్రువపత్రాల వివరాలు తదితర అంశాలను సంబంధిత శాఖ కార్యాలయం ద్వారా తెలుసుకోవచ్చని KS విశ్వనాథన్ తెలిపారు. జర్నలిజం రంగంలో నాణ్యతను ప్రోత్సహించేందుకు, ప్రజా ప్రయోజనాలకు అనుగుణంగా పనిచేస్తున్న జర్నలిస్టులను గుర్తించి గౌరవించేందుకు ఈ అవార్డులు ఉపయోగపడతాయని ఆయన అభిప్రాయపడ్డారు.
