రాయలసీమ న్యూస్, ఆంధ్రప్రదేశ్ డెస్క్: దివ్యాంగుల వాహనాలకు టోల్ మినహాయింపు కోసం జారీ చేసే ఫాస్టాగ్‌ల కాలపరిమితిని కేంద్ర ప్రభుత్వం సవరించింది. కొత్త నిబంధనలు నేటి నుంచి అమల్లోకి వచ్చాయి. ఇప్పటి వరకు ప్రతి సంవత్సరం ఫాస్టాగ్ పునరుద్ధరణ చేయాల్సి ఉండగా, ఇకపై వైకల్య శాతాన్ని ఆధారంగా చేసుకుని దీర్ఘకాలికంగా ఫాస్టాగ్ మంజూరు చేయనున్నారు.
కేంద్ర ప్రభుత్వం తీసుకున్న తాజా నిర్ణయం ప్రకారం 70 నుంచి 100 శాతం వరకు వైకల్యం ఉన్న దివ్యాంగులకు ఐదేళ్ల కాలపరిమితితో ‘ఎగ్జెంప్టెడ్ ఫాస్టాగ్’ జారీ చేయనున్నారు. అలాగే 40 నుంచి 70 శాతం వరకు వైకల్యం ఉన్నవారికి మూడేళ్ల కాలపరిమితితో టోల్ మినహాయింపు ఫాస్టాగ్ అందించనున్నారు.
దివ్యాంగుల వాహనాలకు టోల్ మినహాయింపు కల్పించే వ్యవస్థలో ఇప్పటి వరకు ప్రతి ఏడాది ఫాస్టాగ్ రెన్యువల్‌ చేయాల్సి రావడంతో లబ్ధిదారులు ఇబ్బందులు ఎదుర్కొంటున్నారని కేంద్రం గుర్తించింది. ఈ నేపథ్యంలో వారిపై భారాన్ని తగ్గించేందుకు, ప్రక్రియను సులభతరం చేయడానికి కాలపరిమితిని పెంచే నిర్ణయం తీసుకుంది.
వైకల్య శాతాన్ని ఆధారంగా చేసుకుని కాలపరిమితి నిర్ణయించడం ద్వారా, ఎక్కువ శాతం వైకల్యం ఉన్నవారికి ఎక్కువకాలం టోల్ మినహాయింపు సౌకర్యం నిరంతరంగా లభించేలా చర్యలు తీసుకున్నారు. దీంతో తరచూ పునరుద్ధరణ కోసం దరఖాస్తులు, పత్రాల సమర్పణ, ధృవీకరణ వంటి ప్రక్రియల నుంచి దివ్యాంగులు కొంతవరకు విముక్తి పొందనున్నారు.
ఏటా రెన్యువల్‌ చేసుకునే ఇబ్బందులు తప్పించేందుకే ఈ కొత్త నిబంధనలు తీసుకొచ్చినట్లు కేంద్రం స్పష్టం చేసింది. కొత్త కాలపరిమితి అమలులోకి రావడంతో దేశవ్యాప్తంగా దివ్యాంగుల వాహనాల టోల్ మినహాయింపు ఫాస్టాగ్ వ్యవస్థలో మార్పులు చోటుచేసుకుంటున్నాయి.
