రాయలసీమ న్యూస్, అన్నమయ్య:
ఆదాయపు పన్ను శాఖ పేరుతో వాట్సాప్ నకిలీ నోటీసులు –
ప్రజలు అప్రమత్తంగా ఉండాలని అన్నమయ్య జిల్లా ఎస్పీ హెచ్చరిక
అన్నమయ్య జిల్లా మదనపల్లి పరిధిలో ఆదాయపు పన్ను శాఖ పేరుతో వాట్సాప్లో నకిలీ నోటీసులు పంపిస్తున్న ఘటనల నేపథ్యంలో ప్రజలు అత్యంత అప్రమత్తంగా ఉండాలని జిల్లా ఎస్పీ ధీరజ్ కునుబిల్లి ఐపీఎస్ హెచ్చరించారు. తెలియని నంబర్ల నుండి వస్తున్న సందేశాలు, ముఖ్యంగా ఆదాయపు పన్ను శాఖ అధికారిక నోటీసుల పేరుతో వస్తున్న వాటిని నిర్లక్ష్యం చేయాలని, వాటిలో ఉన్న లింకులు, ఫైల్స్ను ఎట్టి పరిస్థితుల్లోనూ ఓపెన్ చేయవద్దని సూచించారు.
ఎస్పీ వివరాల ప్రకారం, ఇటీవలి కాలంలో వాట్సాప్ ద్వారా ఆదాయపు పన్ను శాఖ నోటీసుల పేరుతో కొన్ని సందేశాలు ప్రజలకు చేరుతున్నాయి. ఆ సందేశాల్లో అనుమానాస్పద లింకులు, ఫైల్స్ (.zip, .exe) ఉంటున్నాయని, వాటిని క్లిక్ చేసిన వెంటనే మొబైల్ ఫోన్ హ్యాక్ అయ్యే అవకాశం ఉందని ఆయన తెలిపారు. ఫోన్ హ్యాక్ అయిన తర్వాత సంబంధిత వ్యక్తుల బ్యాంక్ ఖాతాల వివరాలు నేరగాళ్ల చేతికి చేరి, క్షణాల్లో ఖాళీ చేసే ప్రమాదం ఉందని ఎస్పీ హెచ్చరించారు.
ఆదాయపు పన్ను శాఖ అధికారికంగా వాట్సాప్ ద్వారా ఎలాంటి నోటీసులు పంపదని ఎస్పీ స్పష్టం చేశారు. కాబట్టి ఆదాయపు పన్ను శాఖ పేరుతో వాట్సాప్లో వచ్చే సందేశాలు, నోటీసులపై నమ్మకం పెట్టుకోవద్దని, గుర్తు తెలియని నంబర్ల నుండి వచ్చే సందేశాలకు స్పందించకూడదని ఆయన సూచించారు. సందేశం నిజస్వరూపం తెలియకపోతే సంబంధిత శాఖ అధికారిక వెబ్సైట్ లేదా కార్యాలయాన్ని సంప్రదించి ధృవీకరించుకోవాలని ప్రజలకు సూచించారు.
సైబర్ మోసాలకు గురైన వారు ఆలస్యం చేయకుండా వెంటనే చర్యలు తీసుకోవాలని ఎస్పీ ధీరజ్ కునుబిల్లి ఐపీఎస్ పిలుపునిచ్చారు. ఆర్థిక సంబంధిత సైబర్ మోసాలకు గురైన బాధితులు వెంటనే టోల్ ఫ్రీ హెల్ప్లైన్ 1930కు కాల్ చేయాలని ఆయన సూచించారు. అలాగే సైబర్ నేరాలపై ఫిర్యాదులు నమోదు చేయడానికి కేంద్ర ప్రభుత్వం ఏర్పాటు చేసిన www.cybercrime.gov.in పోర్టల్ను ఉపయోగించుకోవచ్చని తెలిపారు.
సైబర్ నేరాల నివారణకు ప్రజల అప్రమత్తత అత్యంత కీలకమని, ప్రతి సందేశాన్ని పరిశీలించి, అనుమానం ఉన్నప్పుడు వెంటనే సంబంధిత అధికారులను సంప్రదించాలని ఎస్పీ ధీరజ్ కునుబిల్లి ఐపీఎస్ సూచించారు. సైబర్ నేరాలపై అవగాహన పెంచుకోవడం ద్వారా మాత్రమే ఇటువంటి మోసాల నుండి రక్షించుకోవచ్చని ఆయన పేర్కొన్నారు.
