రాయలసీమ న్యూస్, డిస్ట్రిక్ట్ న్యూస్ డెస్క్:
తల్లికి వందనం డబ్బు వివాదం..
భార్య హత్యకు దారితీసిన విషాదం
అన్నమయ్య జిల్లా పిటియం మండలం రాపూరివారిపల్లి పంచాయతీ పరిధిలోని కొత్తపల్లి సమీపంలో ప్రభుత్వం అమలు చేస్తున్న సంక్షేమ పథకం నేపథ్యంలో దారుణ హత్య చోటుచేసుకుంది. విద్యార్థుల తల్లుల ఖాతాల్లో జమ చేసిన తల్లికి వందనం నగదు విషయంలో భర్త–భార్య మధ్య నెలకొన్న వివాదం చివరకు ప్రాణాంతకంగా మారింది. ఈ ఘటనతో ప్రాంతంలో తీవ్ర కలకలం రేగింది.
కొత్తపల్లికి చెందిన సురేష్, పద్మావతి దంపతులకు ఇద్దరు కుమారులు ఉన్నారు. పెద్ద కుమారుడు ప్రణీత్ ఐదో తరగతి, చిన్న కుమారుడు విష్ణు మూడో తరగతి చదువుతున్నారు. పేద కుటుంబాల సంక్షేమం కోసం రాష్ట్ర ప్రభుత్వం విద్యార్థుల తదుపరి చదువుల కోసం తల్లుల బ్యాంకు ఖాతాల్లో తల్లికి వందనం పేరుతో నగదు జమ చేసింది. ఈ మొత్తాన్ని ఎలా వినియోగించాలనే విషయంలోనే ఈ కుటుంబంలో కలహాలు మొదలయ్యాయి.
పోలీసుల ప్రాథమిక సమాచారం ప్రకారం, ప్రభుత్వంచే జమ అయిన ఆ డబ్బులను కుటుంబ అవసరాల కోసం వినియోగించాలని సురేష్ భావించాడు. అయితే ఆ నగదును పిల్లల చదువుల కోసమే ఉంచాలని పద్మావతి పట్టుబట్టింది. ఈ నేపథ్యంలో ఇద్దరి మధ్య మాటామాటా పెరిగి తరచూ వాగ్వాదాలు జరుగుతున్నాయని స్థానికులు చెబుతున్నారు.
ఇటీవల మరోసారి ఇదే అంశంపై దంపతుల మధ్య వాగ్వాదం చెలరేగింది. డబ్బులు ఇవ్వాలని సురేష్ పదేపదే ఒత్తిడి చేసినప్పటికీ పద్మావతి అంగీకరించలేదు. చిన్నగా మొదలైన ఈ వివాదం క్రమంగా తీవ్రరూపం దాల్చింది. ఆర్థిక అంశంపై నెలకొన్న ఈ కలహం వారి దాంపత్య జీవితంలో చిచ్చు పెట్టింది.
క్షణికావేశంలో సురేష్ తీవ్ర నిర్ణయం తీసుకున్నట్లు పోలీసులు చెబుతున్నారు. కోపావేశంలో అతడు భార్య పద్మావతిపై దాడి చేయగా, ఆమె అక్కడికక్కడే మృతిచెందినట్లు సమాచారం. కట్టుకున్న భార్య అనే మానవీయ భావనను పక్కనబెట్టి ఇంత దారుణానికి ఒడిగట్టడంపై గ్రామస్థులు షాక్కు గురయ్యారు. ఈ ఘటనతో గ్రామంలో భయాందోళనలు నెలకొన్నాయి.
సమాచారం అందుకున్న పోలీసులు వెంటనే సంఘటన స్థలానికి చేరుకుని పరిశీలించారు. మృతురాలి మృతదేహాన్ని స్వాధీనం చేసుకుని పోస్టుమార్టం నిమిత్తం ప్రభుత్వ ఆసుపత్రికి తరలించారు. మృతురాలి తల్లి కళావతి ఇచ్చిన ఫిర్యాదు ఆధారంగా పోలీసులు కేసు నమోదు చేసి దర్యాప్తు ప్రారంభించారు.
