రాయలసీమ న్యూస్, క్రైమ్ డెస్క్: మార్కాపురం జిల్లా గిద్దలూరు మండలం కె.ఎస్. పల్లి గ్రామానికి చెందిన ప్రైవేట్ ఉపాధ్యాయుడు అమీర్ బాషా అక్రమ సంబంధం, భార్యపై వేధింపుల కేసులో జైలు పాలయ్యాడు. తాళి కట్టిన భార్యను, కన్న కొడుకుని నిర్లక్ష్యపరిచి, వేరే మహిళతో సహజీవనం చేస్తూ, మొదటి భార్యకు శారీరక, మానసిక వేధింపులు కలిగించినందుకు కోర్టు 30 రోజుల జైలు శిక్ష విధించింది.
స్థానిక సమాచారం ప్రకారం, ప్రైవేట్ ఉపాధ్యాయుడిగా పనిచేస్తున్న అమీర్ బాషా ఎనిమిదేళ్ల క్రితం తన భార్య, చిన్న కొడుకుని పూర్తిగా వదిలేశాడు. వారిని పోషించాల్సిన బాధ్యతను విస్మరించి, కనీసం పోషణ ఖర్చులు కూడా ఇవ్వకుండా నిరుదయంగా దూరమయ్యాడు.
తర్వాత అమీర్ బాషా మరో మహిళతో అక్రమ సంబంధం పెట్టుకుని, ఆమెతో సహజీవనం ప్రారంభించాడు. ఈ సహజీవనంలో ఒక పాపకు జన్మనిచ్చినట్లు సమాచారం. ఇదిలా ఉండగా, మొదటి భార్యను శారీరకంగా, మానసికంగా వేధిస్తూ నరకం చూపినట్లు బాధితురాలు ఆరోపణలు చేసింది.
ఈ వేధింపులను తట్టుకోలేక బాధితురాలు న్యాయస్థానాన్ని ఆశ్రయించింది. ఆమె ఫిర్యాదు ఆధారంగా కేసు నమోదు చేసి విచారణకు తీసుకున్నారు. కేసు విచారించిన న్యాయమూర్తి భరత్ చంద్ర, అమీర్ బాషా చేసిన అక్రమాలు, భార్యపై చేసిన వేధింపులను పరిగణనలోకి తీసుకుని, 30 రోజుల జైలు శిక్ష విధిస్తూ తీర్పు ఇచ్చారు.
కోర్టు ఉత్తర్వుల మేరకు పోలీసులు అమీర్ బాషాను అదుపులోకి తీసుకుని, మార్కాపురం సబ్‌జైలుకు తరలించారు. ఉపాధ్యాయ వృత్తి గౌరవానికి విరుద్ధంగా ప్రవర్తించిన అమీర్ బాషా జైలు పాలవ్వడంతో స్థానికంగా తీవ్ర చర్చనీయాంశంగా మారింది.
సమాజానికి నీతులు చెప్పాల్సిన స్థాయిలో ఉన్న ఉపాధ్యాయుడు ఇలాంటి అక్రమాలకు పాల్పడటం పట్ల గ్రామస్థులు ఆగ్రహం వ్యక్తం చేస్తున్నారు. కుటుంబ బాధ్యతలను విస్మరించి, భార్య, పిల్లల భవిష్యత్తును గాలికొదిలేసిన అమీర్ బాషా పై కోర్టు విధించిన శిక్షకు గ్రామంలో మిశ్రమ స్పందన వ్యక్తమవుతోంది.
ఈ ఘటనతో గిద్దలూరు మండలంలో ఉపాధ్యాయ వృత్తి నైతికత, కుటుంబ బాధ్యతలపై చర్చలు మొదలయ్యాయి. భార్య, పిల్లల పోషణ బాధ్యతను నిర్వర్తించకపోతే చట్టపరమైన చర్యలు తప్పవని, ఈ కేసు మరోసారి స్పష్టం చేసింది.
